Një katastrofë ekologjike: po shkatërrohen lumenjtë tanë

“Si pasojë e shfrytëzimit të lumenjve, marrjes së inerteve, për dy dekada me radhë, ne kemi prishur ekuilibrat natyrorë të marrëdhënieve mes lumit dhe detit. Lumenjtë nuk shkarkojnë më materiale të ngurta në det dhe deti ka nisur të bëhet agresiv, duke pushtuar tokën. Fenomeni i erozionit detar dhe përmbytjet në Ultësirën e Lezhës, më shumë se probleme baticash dhe rritjes së nivelit nga ngrohja globale, janë probleme të prishjes së këtyre ekuilibrave. Sipas studimit, deti përparon mesatarisht 15-20 metra në vit. Konkretisht, në Seman, në një gjatësi prej 6 mijë metrash vijë bregdetare, gjatë dhjetë viteve të fundit, deti ka marrë nga toka jonë 200 hektarë plazh, pyll dhe tokë. Si pasojë e shkatërrimit të lumenjve Erzen dhe Ishëm, plazhi i Gjirit të Lalzit, ai për të cilin po luftohet sot mes ish- pronarëve dhe pushtetarëve si për tokën e Jerusalemit, brenda fare pak vitesh do të pushtohet nga deti. Si pasojë e këtij agresiviteti, po shkatërrohet zona e grykëderdhjes së Bunës dhe plazhi i Velipojës ka pësuar ndryshime të mëdha (thellësia e ujit fillon menjëherë)” – ky është thelbi i artikujve studimorë të profesor Spiro Boci, që nënvizohet në një shkrim të Mentor Kikias të publikuar në Shqipin e sotëm.

”Askush nuk po alarmohet nga kjo që po ndodh” – ky është nënvizimi tjetër i Kikias. Në fakt, është tragjikisht e vërtetë. Janë bërë denoncime pafund nga media lidhur me këtë histori (studjuesi Boci është një nga të shumtit që po u bie borive të alarmit), por nuk ka reagime. Nuk ka asnjë reagim. Kryeministri Berisha flet çdo ditë e disa herë në ditë, merret gjerë e gjatë me opozitën, e me dreqin me të birin, por nuk thotë një fjalë të vetme lidhur me shkatërrimin që po u bëhet lumenjve nëpërmjet gërryerjes së shtretërve të tyre. Pse nuk flet? Pse? Pse?

Re.Pu.