Çili për marrëdhëniet gazetar-botues, dhe reagimi i Ballës

Henri Çili, administratori i Universitetit Europian të Tiranës, shtëpia botuese e të cilit UET Press sapo ka botuar librin e gazetarit Sokol Balla "Fjala e lire, sfidë europiane", ka hedhur një tezë cinike, por edhe me vlerë debati në parathënien e librit në fjalë. “Për sa kohë që mediat, në pjesën më të madhe të ndërmarrjes së tyre, nuk e mbështesin veten financiarisht, pse duhet që të ketë konflikt mes botuesve dhe kryeredaktorëve?”, pyet Çili. Sigurisht, ai e shtron në formë pyetjeje, por hedh megjithatë farën e një debati për botën mediatike duke qenë se edhe vetë është botues i së përditshmes MAPO. Pra, a duhet të ankohen gazetarët për ndërhyrjet a atyre që i mbështesin financiarisht mediat, kur puna e tyre nuk përkthehet me vlerë në tregun e shitjes? Sokol Balla i është përgjigjur tezës së Çilit gjatë promovimit të librit duke thënë se libri i kushohej fëmijëve të tij, "të cilët kanë nevojë për rrogën time, por dua që ata të jenë të lirë dhe ata nuk mund të jenë të tillë nëse në vendin e tyre shprehja nuk është e lirë".
H.B.