Lidhja me Epstein, KE i kërkon OLAF-it hetimin e ish-komisionerit britanik

Komisioni Evropian ka kërkuar nga Zyra Evropiane Kundër Mashtrimit (OLAF) të shqyrtojë veprimet e Peter Mandelson gjatë kohës kur ai shërbente si komisioner britanik për tregtinë në Bruksel, në periudhën 2004–2008.

Sipas një zëdhënësi të Komisionit, kërkesa zyrtare iu dërgua OLAF-it më 18 shkurt, pas publikimit të mijëra dokumenteve që përmendin lidhjet e tij me financierin amerikan Jeffrey Epstein. “Duke pasur parasysh rrethanat dhe sasinë e konsiderueshme të dokumenteve të bëra publike, Komisioni i kërkoi OLAF-it të hetojë çështjen”, thuhet në deklaratë. Institucioni shtoi se dokumentet e reja po shqyrtohen për të vlerësuar nëse ka pasur ndonjë shkelje të detyrimeve përkatëse.

Sipas burimeve të njohura me çështjen, hetimi pritet të ketë një shtrirje të gjerë dhe në fazën fillestare të mos përqendrohet në një aspekt të vetëm specifik.

Zhvillimi pason arrestimin e Mandelson nga policia britanike nën dyshimin për sjellje të pahijshme në detyrë publike. Ai u mbajt për nëntë orë në pyetje dhe më pas u lirua me kusht. Mandelson ka deklaruar se nuk ka kryer asnjë shkelje.

Më herët, kreu i partisë britanike Reform UK, Nigel Farage, i kishte dërguar një letër OLAF-it duke kërkuar hetim ndaj ish-komisionerit. Në letrën drejtuar drejtuesit të OLAF-it, Farage ngrinte pyetjen nëse informacion zyrtar ishte përcjellë gjatë mandatit të Mandelson në Komision.

Dokumente të publikuara nga Departamenti Amerikan i Drejtësisë tregojnë se Epstein i kishte dërguar pagesa me vlerë totale 75 mijë dollarë Mandelson në vitet 2003 dhe 2004. Sipas të njëjtave dosje, në vitet 2009 dhe 2010 ai i kishte përcjellë Epstein informacione që përfshinin një dokument të Downing Street mbi ndryshime tatimore dhe të dhëna lidhur me një shitje asetesh me vlerë 20 miliardë paundë, si dhe informacione paraprake mbi një paketë shpëtimi prej 500 miliardë eurosh nga Eurozona.

Mandati i Mandelson si komisioner i tregtisë ishte shoqëruar edhe më parë me polemika. Në vitin 2008, ai mohoi se kishte favorizuar oligarkun rus Oleg Deripaska në lidhje me çështjen e tarifave mbi aluminin. Në vitin 2018, Deripaska u përfshi në listën e sanksioneve të SHBA-së për lidhjet e tij me presidentin rus Vladimir Putin.

Hetimi i OLAF-it pritet të përcaktojë nëse ka pasur shkelje gjatë ushtrimit të detyrës së Mandelson në Komisionin Evropian.