Progres i konsiderueshëm në bisedimet SHBA-Iran

Shtetet e Bashkuara dhe Irani kanë bërë përparim të konsiderueshëm në bisedimet e së enjtes, që synojnë zgjidhjen e një mosmarrëveshjeje të gjatë bërthamore dhe shmangien e sulmeve të reja të SHBA-së.

Të dyja palët planifikojnë të rifillojnë negociatat menjëherë pas konsultimeve në kryeqytetet e vendeve të tyre, me diskutime në nivel teknik të planifikuara të zhvillohen javën e ardhshme në Vjenë, tha Ministri i Jashtëm i Omanit, Sayyid Badr Albusaidi, në një postim në X pas përfundimit të bisedimeve në Zvicër.

Çdo lëvizje thelbësore drejt një marrëveshjeje mes Uashingtonit dhe Teheranit shihet si mundësi për të shmangur një sulm kërcënues amerikan ndaj Iranit, gjë që mund të sillte përshkallëzim në një luftë më të gjerë.

Vlerësimi optimist i ministrit të Omanit pasoi bisedimet indirekte midis Ministrit të Jashtëm iranian, Abbas Araqchi, dhe të dërguarve të SHBA-së, Steve Witkoff dhe Jared Kushner, në Gjenevë, me një seancë në mëngjes dhe të dytën në pasdite.

Duke i përshkruar bisedimet si disa nga më seriozet që Irani ka pasur me SHBA-në, Araqchi i tha televizionit shtetëror iranian: "Ne arritëm marrëveshje për disa çështje, dhe ka dallime në lidhje me disa çështje të tjera."

"U vendos që raundi tjetër i negociatave të zhvillohet së shpejti, në më pak se një javë," tha ai, duke shtuar se iranianët kishin shprehur qartë kërkesën e tyre për lehtësimin e sanksioneve.