Borselino

Të bësh opozitarin në Shqipëri duhet të jetë punë e lehtë. Në çdo kohë e ke të lehtë të ndërtosh imazhin e një qeverie që vetëm vjedh dhe plaçkit, për shkak se kjo gjë i afrohet shumë të vërtetës. Në çdo kohë e ke të lehtë të shfaqesh si i mençur e të kapësh gabime përditë, të propozosh korrigjime etj., pra të bësh zhurmë opozitare.

Largimi i Fatmir Xhafës nuk ka qenë kërkesë e ndërkombëtarëve, por hall i brendshëm i tij dhe i qeverisë. Ikja pa një motiv, por me argumentin se përmbushi objektivat ishte një sqarim i sforcuar që në radhë të parë tradhëtohej nga vetë fytyra e Xhafës.

Ambasadori i Bashkimit Europian Luigi Soreca konfirmoi në një intervistë për "Opinion" se as përfaqësia e Brukselit në Tiranë nuk ka qenë në dijeni për arsyet e largimit të ish-ministrit të Brendshëm në kulmin e suksesit të tij.