Shënim: Për çfarë vlejnë sondazhet në internet rreth zgjedhjeve parlamentare

Para ca ditësh gazeta Shekulli dhe aktualisht gazeta Shqip, i kanë ofruar lexuesve të faqeve të tyre në internet mundësinë për të regjistruar në mënyrë anonime preferencën e votimit të tyre për partitë politike që do të garojnë në zgjedhjet parlamentare në Shqipëri. Në sondazhin e Shekullit, rezultoi se PS-ja ishte partia e parë, me një diferencë të madhe nga partia e dytë, e cila nuk ishte PD-ja, por Aleanca Kuqezi (AK). Ndërsa deri në momentin kur po shkruhen këto rrjeshta, në sondazhin e Shqipit, rezulton se PS-ja ka një distancë edhe më të madhe se te Shekulli nga AK-ja dhe kjo e fundit e lë shumë prapa PD-në.

A mund të vlejnë këto sondazhe për të na dhënë një fotografi të përafërt të preferencave të elektoratit shqiptar? Absolutisht jo. Që një sondazh të përfaqësojë preferencat e një popullsie, ndertimi i kampionit duhet të bazohet në parimin e zgjedhjes së rastësishme nga sondazhisti, dhe jo në parimin e vetëzgjedhjes së të anketuarve.

Por për çfarë mund të vlejnë sondazhet në internet të gazetave Shekulli dhe Shqip? Në rastin më të mirë, për të na dhënë një fotografi të përafërt të preferencave të lexuesve të tyre. Në qoftë se i njëjti sondazh do të zhvillohej në faqet e gazetave Koha Jonë dhe Standard, gjasat do të ishin shumë të mëdha që fotografia të tregonte se parti e parë është PD-ja, me shumë pikë diferencë nga partia e dytë…

E.Zaloshnja