Analistja shqiptare e ESI-t: Vetëm kthimi i Muhos e kthen KQZ-në në binarë ligjorë

Besa Shahini, një zonjë nga Shqipëria, që Zëri i Amerikës e kualifikon si eksperte të Iniciativës Evropiane për Stabilitet, ka qenë e pranishme në seancën e Komisionit të Helsinkit në Washington, që ish mbledhur për Shqipërinë. Dhe ka folur aty në emër të Think Tank-ut me seli në Berlin. sot ka qenë Keida Kostreci e Zërit të Amerikës që i ka marrë një intervistë lidhur me atë që ndodhi në seancën e Komisionit të Helsinkit.

Dhe opinioni i saj ka qenë shumë i qartë: “Me largimin e një anëtari [të KQZ-së]në një mënyrë që nuk parashihet në ligj, sipas analizës sonë, është bërë një thyerje e parimeve kryesore, që duhet të mbizotëronin organizmin e zgjedhjeve. E dyta është që ka mbetur një KQZ me katër anëtarë për shkak se tre anëtarë të tjerë dhanë dorëheqjen dhe është një KQZ gjysmake që mund të kryejë vetëm një pjesë të funksioneve. Nuk mundet të kryejë disa funksione kyçe që kanë të bëjnë me gjykimin e ankesave që mund të ndodhin pas zgjedhjeve. Në këtë rast pra kemi një problem të madh kur dihet se në Shqipëri disa prej cikleve zgjedhore kanë qenë të kundërshtueshme dhe me një KQZ të tillë ne frikësohemi që mund të kemi përsëri kontestim të rezultatit të zgjedhjeve dhe mundet në një farë mënyre që Shqipëria të zbresë në një cikël tjetër destabiliteti që nuk është në fakt një problem vetëm për  Shqipërinë, por për gjithë rajonin. Në këtë aspekt ne mendojmë se ka ende hapësirë që ky problem të rregullohet nëse tërhiqet largimi që nuk ka qenë i bazuar në ligj i një anëtari të KQZ-së, për shkak se largimi si i tillë është joligjor edhe pse ndërkohë u kuptua që nominimi i zotit Muho ka mundësi të ketë qenë joligjor, por edhe largimi i tij është definitivisht joligjor.”

Intervista e plotë mund të gjendet në linkun http://www.gazetatema.net/web/2013/05/08/intervista-shahini-zgjidhja-e-krizes-ne-kqz-rikthimi-i-anetarit-te-larguar-ne-menyre-joligjore/

Re.Pu.