Hidhet ideja për shkëputjen e vendeve të BRICS nga interneti global

Vendet e BRICS mund të krijojnë hapësirën e vet kibernetike, jashtë asaj globale. Zëvendëskryetari i parë i Komitetit të Kontrollit të Dumës Shtetërore, Dmitry Gusev, ishte i pari që e hodhi këtë propozim.

Sipas një dokumenti të cilit i referohet RIA Novosti, sipas RT, kërkesa i është paraqitur Maksut Shadaev, kreut të Ministrisë së Zhvillimit Dixhital, Komunikimit dhe Medias së Rusisë.

Propozimi për të zhvilluar "një internet ku mbizotërojnë vlerat tradicionale dhe mirësia" mund të zbatohet "duke përdorur aftësi teknike, organizative dhe civilizuese të përbashkëta për të gjithë organizatën".

Sipas Gusev, Forumi i 5-të Ndërkombëtar Komunal BRICS+, i cili po zhvillohet aktualisht në qytetin rus të Shën Petersburgut, është një mundësi e mirë për të diskutuar mbi një internet të unifikuar për vendet e BRICS.

BRICS aktualisht përbëhet nga Brazili, Rusia, India, Kina dhe Afrika e Jugut, por do t'i bashkohen Argjentina, Egjipti, Etiopia, Irani, Arabia Saudite dhe Emiratet e Bashkuara Arabe në janar. Grupi i zgjeruar, i referuar si BRICS+, parashikohet të përfaqësojë gati gjysmën e PBB-së globale deri në vitin 2040.

Në fillim të kësaj jave, edhe presidenti kinez bëri thirrje për ndryshime në mënyrën se si funksionon interneti global, në dobi të njerëzve të të gjitha vendeve.