Zyrtare nga policia, 3 mjekë të maternitetit vonuan ndërhyrjen me pasojë vdekjen e 35 vjeçares dhe foshnjës së saj

Vërtetohen dyshimet se vdekja e 35 vjeçare Aida Cajka dhe foshnjës së saj erdhi për shkak të neglizhencës së mjekëve. Policia i ka përcjellë Prokurorisë së Tiranës materialet hetimore për 3 punonjës të maternitetit Koço Glozheni, ku një ditë më parë humbi jetën 35 vjeçarja Aida Cajka  në muajin e nëntë të shtatzanisë dhe foshnja e saj.

Dokumentet janë referuar për Helidon Klosin, Dritan Deçkën dhe kirurgen Nazmie Ceni.Policia thotë se  si pasojë e moskryerjes në kohë të shërbimit shëndetësor nga mjekët e lartëpërmendur, në orën 05:00, Aida Cajka dhe fëmija ndërruan jetë.

Ishin familjarët e viktimës që bënë denoncimin për neglizhencë dhe vonesa nga mjekët. Ata thanë se  pas dyshimeve për probleme kardiake mjekët e  maternitetit e dërguan 35 vjeçaren në QSUT , ndërsa këta të fundit dyshuan për ftohje dhe e dërguan në sanatorium. Ishin mjekët e këtij spitali që përcaktuan hemorragjinë e brendshme, por sipas familjarëve  ekipi i mjekeve të maternitetit sërish u vonua në ndërhyrje.

Një ditë më parë Ministria e Shëndetësisë mohoi që ngjarja të kishte si shkak vonesat apo neglizhencën e mjekëve.