Mazhoranca i ndërpret mandatin Llallës

Grupi i ekspertëve të maxhorancës ka përfunduar draftin e reformës në Drejtësi pa ekspertët e opozitës.Drafti do t’i përcillet brenda kësaj jave Komisionit të Posaçëm, i ndryshuar sipas rekomandimeve të Komisionit të Venecias.
Mungesa në tryezë e ekspertëve të opozitës, Enkelejd Alibeaj dhe Gazment Bardhi, nuk e ka penguar grupin tjetër të ekspertëve për të vijuar me ndryshimet në draftin fillestar dhe për të përfshirë çdo rekomandim të bërë nga Komisioni i Venecias.
Ekspertët që përfaqësojnë Ministrinë e Drejtësisë kanë shprehur pakënaqësi për një sërë ndryshimesh të propozuara nga grupi i ekspertëve të nivelit të lartë.
Aktualisht, ekspertët kanë zgjidhur disa nga pikat më të nxehta në debatin e zhvilluar për reformën në Drejtësi. Pavarësisht se Komisioni i Venecias e shikonte si të panevojshme ndërprerjen e mandatit të prokurorit të Përgjithshëm Adriatik Llalla në draftin e korrigjuar, ekspertët e shumicës i kanë qëndruar sërish versionit për ndërprerje të mandatit.
Ndryshimi i ekspertëve të maxhorancës pas rekomandimeve të Venecias lidhet me faktin se lihet një periudhë kohore për zëvendësimin e kryeprokurorit.
Ekspertët e nivelit të lartë kanë vendosur të “largojnë” edhe ministrin e Drejtësisë nga disa organe të Drejtësisë, ku në draftin fillestar kishte të drejtë vote dhe vendimmarrjeje. Duke iu referuar paragrafit 62 të Komisionit të Venecias, ekspertët kanë vendosur të përjashtojnë pjesëmarrjen e ministrit në Këshillin e Lartë Gjyqësor.