Blloku Bota

Turqia ka vendosur tërheqjen nga Traktati mbi Forcat e Armatosura Konvencionale në Europë. Përmes një dekreti të publikuar në gazetën zyrtare, presidenti turk, Recep Tayyip Erdogan ka autorizuar daljen e Turqisë nga një traktat përmes të cilit kufizohen numrin e armëve dhe pajisjeve ushtarake për pesë katgori bazë: tanket, mjetet e blinduara, sistemet e artilerisë me kalibër 100 mm e sipër, avionët dhe helikopterët.

Britania e Madhe do të largohet nga skema e shkëmbimit studentor të BE-së Erasmus+. Shkak i vendimit janë bërë aftësitë e dobëta të britanikëve në gjuhët e huaja, të cilat e kanë bërë anëtarësimin shumë të shtrenjtë për t'u justifikuar.

Për shkak të përvetësimit të ulët të skemës nga studentët britanikë në krahasim me kombësitë e tjera - i kushtëzuar nga aftësitë e dobëta për të mësuar gjuhë – Lodrës i duhet të paguajë gati 300 milionë euro më shumë në vit sesa merr.

Mediat në Kosovës raportojnë për tërheqjen e regjistruesve serbë nga procesi i regjistrimit të popullsisë. Në komunën e Zubin Potokut kanë qëndruar në detyrë vetëm dy regjistrues serbë, çka sinjalizon probleme në proces. Vendimi vjen ndërkohë që autoritetet kosovare kanë deklaruar se kanë rënë dakord me propozimin europian për dinarin ndonëse pala serbe ka refuzuar të pranojë një marrëveshje për këtë gjë.

Ministria e Financave e Rusisë njoftoi se do të dyfishojë blerjet e valutës së huaj dhe arit përgjatë këtij muaji, një lëvizje që e kombinuar me shitjen e bankës qendrore do t'i çojë ndërhyrjet neto të shtetit në forex gati afër zeros.

Rusia e vlerëson si më të arsyeshmin planin e paqes që ka propozuar Kina. Ministri i Jashtëm rus, Sergei Lavrov, tha se ky është plani më i mirë që është propozuar deri tani.

Pekini parashtroi një dokument prej 12 pikash më shumë se një vit më parë që përcaktonte parimet e përgjithshme për përfundimin e luftës, por nuk hynte në detaje. Plani u prit vakët në atë kohë si në Rusi ashtu edhe në Ukrainë, ndërsa Shtetet e Bashkuara thanë se Kina po përpiqej të paraqitej si paqebërëse, por duke reflektuar "narrativën e rreme" të Rusisë.

Ministri rus i Mbrojtjes paralajmëroi homologun e tij francez kundër vendosjes së trupave në Ukrainë. Siç raporton AP, në një telefonatë të rrallë, Sergei Shoigu i tha ministrit francez të mbrojtjes Sébastien Lecornu se nëse Parisi konkretizon deklaratat e tij për mundësinë e dërgimit të një kontigjenti ushtarak francez në Ukrainë, "kjo do të krijojë probleme për vetë Francën".

Presidenti francez, Emmanuel Macron, la të kuptohej dy muaj më parë se mundësia e dërgimit të trupave perëndimore në Ukrainë nuk mund të përjashtohej.

Shtëpia e Bardhë kërkon që agjencia amerikane e hapësirës NASA të zhvillojë një zonë të re kohore për Hënën - Koha e Koordinuar Hënore (CLT).

Koha lëviz më shpejt në Hënë për shkak të fuqisë së ndryshme të fushës gravitacionale. Në raport me Tokën ka një ndryshim prej 58.7 mikrosekonda çdo ditë. Mund të mos duket shumë, por ka ndikim të rëndësishëm kur përpiqesh të sinkronizosh një anije kozmike.

Qeveria e SHBA shpreson se zona e re kohore do të ndihmojë në koordinimin efektiv të përpjekjeve kombëtare dhe private për të arritur në Hënë.

Zvicra do të mbajë një referendum për masat e krijuara për të kufizuar imigracionin për të ndaluar popullsinë të arrijë në 10 milionë para vitit 2050.

Sistemi i demokracisë direkte, me të cilin operon Zvicra, qytetarët mund të iniciojnë një referendum nëse mbledhin 100 000 firma të vlefshme brenda 18 muajve.

Partia e djathtë Popullore Zvicerane (SVP) dorëzoi 114 600 nënshkrime në Kancelarinë Federale në Bernë të mërkurën -- të mbledhura në gjysmën e kohës.

Bashkimi Evropian ka hapur dy hetime për përdorimin e subvencioneve të huaja në sektorin e energjisë diellore.

Lajmin e bëri të ditur sot komisioneri evropian për Tregun e Brendshëm, Thierry Breton.

Ukraina nuk mund ta mbajë më frontin. Këtë shkruan “Politicon” sot duke çuar një hap më tej paralajëmrimin e presidentit ukrainas, Volodymyr Zelenskiy që u shpreh se pa ndihmën perëndimore “ne do të tërhiqemi”. Çfarë nënkupton tërheqja që mesa duket është një formë diplomatike për të pranua lëshimin territorial?