Blloku Bota

Mediat shtetërore të Kinës referojnë për lëshimin e një sateliti të ri në hapësirë që do të testojë teknologjinë 5G dhe 6G që janë zhvilluar nga China Mobile dhe Akademia e Shkencave e Kinës.

Sipas mediave në fjalë teknologjia 6G mishëron një arkitekturë autonome të shpërndarë që përdor softe kinezë dhe harduere po kinezë që janë të afta të mbështesin rindërtimin në hapësirë të softeve dhe funksioneve bazë të rrjetit si dhe menaxhimin automatik.

Mediat në Kosovë raportojnë për përpjekje për atentat ndaj kryeministrit Albin Kurti. Sipas RTK-së, ka patur një përpjekje të Serbisë për të vrarë Albin Kurtin gjatë qëndrimit të tij në Shkup.

Ka qenë një kombinacion operativ serb, ku janë gërshetuar mashtrimet mediale me veprimet në terren nga atentatorë të mundshëm të ekstremit serbo-maqedonas, të afërt me Federatën Ruse, por nën kontrollin e institucioneve serbe

citon RTK-ja një burim të institucioneve të Serbisë.

Ta marrim të mirëqenë se qeveria e Kosovës është e mjerë, pa vision dhe se ajo vetëm i ka prishur punë Kosovës. Këtë thotë opozita kosovare e përbërë kryesisht nga njerëz që janë provuar në pushtet dhe po duken edhe tani për nivelin që kanë. Megjithatë është e qartë se përveç ndonjë krize akute, politika e jashtme nuk e rrëzon një qeveri të një vendi si Kosova. Dhe aq më pak pastaj diplomacia e saj që është zbatim i një politike të jashtme që në rastin e Kosovës nuk ndryshon.

Është përcjellë me shumë reagime intervista e Tucker Carlson me presidentin e Rusisë, Vladimir Putin. Dy orë e gjashtë minuta, 60 pyetje për disa tema, ku dominoi Ukraina. Putin është shprehur i gatshëm për të mbyllur një marrëveshje me presidentin ukrainas, Volodymyr Zelenskiy, për të cilin beson se e ka fuqinë ta bëjë një gjë të tillë. Nga ana tjetër, Putin ka nënvizuar se tashmë është e qartë edhe në Perëndim, se Rusia nuk mund të mposhtet në Ukrainë.

Presidenti ukrainas, Volodymyr Zelenskiy ka shkarkuar sot kreun e ushtrisë, gjeneralin Valery Zaluzhny, një lajm të cilin e ai e ka njoftuar personalisht në rrjetin social “X”.

U takova me gjeneralin Valerii Zaluzhny. E falenderova për dy vitet në mbrojtje të Ukrainës. Diskutuam rinovimin që kërkohet në Forcat e Armatosura të Ukrainës. Diskutuam po ashtu se kush mund të jetë pjesë e lidershipit të Forcave të Armatosura. I propozova gjeneralit Zaluzhny që të jetë pjesë e ekipit. Ne do të fitojmë. Lavdi Ukrainës!

Serbia e Aleksander Vuçiçit ngjan se po zhytet në një klimë toksike politike, ku mosmarrëveshja për pushtetin po ndan vendin. Kjo u duk që gjatë fushatës elektorale të fundit me mënyrën sesi palët iu adresuan njëra-tjetrës, ndërkohë që marrëdhëniet u acaruan pas zgjedhjeve kur vëzhgues ndërkombëtarë nisën të kritikonin procesin dhe të flisnin për manipulime elektorale.

Peter Stano ka një detyrë shumë të pakëndshme nëse e sheh nga jashtë. Zëdhënësi i Josep Borrellit del e deklaron çfarë i autorizojnë pa patur në fakt vlerën e asgjëje më shumë sesa një njoftimi. Në dallim me zëdhënësat në SHBA, zoti Stano të kujton një automat që mund të thotë çdo gjë.

Parlamenti Europian ka përgatitur një draft rezolutë përmes së cilës bën thirrje për hetim ndërkombëtar të zgjedhjeve të fundit në Serbi.

Drafti që citohet nga mediat opozitare të Serbisë, kërkon që vëmendja kryesore e ekspertëve të përqendrohet në Beograd dhe dënon sulmet e Presidentit Aleksander Vuçiç dhe kryeministres Ana Brnabiç ndaj vëzhguesve ndërkombëtarë.

Komisioneri për Zgjerim Varelhy, ambasadori amerikan në Kosovë, Hoveneier, ambasadori gjerman në Kosovë, Rohde dhe KE-ja kanë bërë thirrje që Kosova të shtyëj aplikimin e euros si monedhë të sajën, duke përjashtuar dinarin. Presidenti serb, Vuçiç, ka kërkuar seancë urgjente në Këshillin e Sigurimit, ministri i Mbrojtjes së Serbisë, Vuçeviç, e lidh mbijetesën e serbëve në Kosovë me dinarin.

Situata e fundit në Kosovë, me thirrjet e një pjese të madhe të komunitetit Perëndimor që Prishtina të heqë dorë nga masat e veta për të ndaluar dinarin, apo edhe për të shpërbërë strukturat paralele të Serbisë, konfirmon një problem me rëndësi strategjike për të ardhmen e mbarë Europës. Perëndimi nuk po di dhe nuk po do më të sillet si pol real pushteti dhe shtuar kësaj, nuk konsideron dot marrëdhënie partneriteti veçse me ata që kanë forcën për ta afirmuar një gjë të tillë.