Kryeministri e quajti idiotësi - BIRN boton shkresën për ngritjen e grupit të punës për dëmshpërblimin e familjarëve të viktimave të 21 janarit

Kryeministri i Shqipërisë doli dje në intervistën e parë për vitin 2015 në “Shqip” të Rudina Xhungës. Dhe duhet thënë se u mor jo pak me mediat, me gazetarët, duke i quajtur thuajse të gjitha kritikat, apo çështjet e ngritura këto kohë, si mite të ndërtuara në pabesi të së vërtetës. Idiotësi quajti ai edhe lajmin e publikuar nga BIRN se familjarët e viktimave të 21 janarit kanë negociuar me qeverinë për një dëmshpërblim prej 400 milionë lekësh. Ja se çfarë tha kryeministri që ka marrë votën e 1 milionë shqiptarëve:“Kjo është një tjetër idiotësi dhe i duhet vënë, në fakt, emri i duhur këtyre idiotësive, sepse dihet fare mirë që Qeveria nuk ka në dorë të përcaktojë një dëmshpërblim që e përcakon gjykata”. Madje shtoi me siguri të plotë se familjarët e viktimave kërkojnë vetëm një gjë: Drejtësi. Mirëpo mund të dalë pak si ndryshe ky muhabet, sepse sot BIRN boton një shkresë, që mban një firmë sipër me emrin Edi Rama, që pranohet juridikisht se ka detyrën e kryeministrit në vendin tonë. Dhe shkresa përcakton ngritjen e një grupi pune që më 31 korrik 2014 pikërisht për çështjen e dëmshpërblimit. Madje BIRN boton edhe faturat postare të kërkesave që dy nga djemtë e viktimave i dërgojnë Këshillit të Ministrave. “Grupi ndërinstitucional i punës ka për detyrë, që përmes angazhimit të ekspertëve vlerësues të licencuar, të bëjë përllogaritjen e drejtë të dëmit të pësuar nga viktimat në përputhje me praktikat më të mira kombëtare si dhe të gjejë burimet për përballimin e efekteve financiare. Grupi i punës të përgatisë një raport të hollësishëm për punën e vet, që së bashku me akt-ekspertimet e ekspertëve vlerësues, t’ia paraqesë ministrit të Punëve të Brendshme brenda 60 ditëve nga data e hyrjes në fuqi të këtij urdhri,” referon BIRN urdhrin. Duke supozuar se shkresa është e vërtetë dhe me gjasë BIRN e ka ruajtur atë si fishekun e fundit, do duhet që konstatimi i bërë me zë të ngritur nga kryeministri të përmbyset si pyetje: po ç’është kjo idiotësi që po bën vaki në një shtet ligjor e të së drejtës si Shqipëria?
http://www.reporter.al/kryeministri-ngriti-grup-pune-per-dem...
s.z