Nis fushata për zgjedhjet lokale. Premtime nga të gjithë. Kandidatët mbahen ende sekret

Kreu i PD-së, Lulzim Basha, e ka nisur fushatën elektoral për zgjedhjet lokale të 21 qershorit nga fshatrat e Lezhës. Basha ka bërë edhe premtime, si ai për uljen e çmimit të energjisë, apo edhe punësimin, njësoj si kundërshtarimi vet politik. “Kam nisur sot nga Lezha turin politik të radhës në Shqipëri për t’u takuar e ritakuar me njerëzit, për t’i pyetur, dëgjuar, për të prekur, njohur e vlerësuar sa më mirë dhe sa më drejt gjendjen ekonomike dhe shoqërore të vendit”, tha ai që ka shtuar edhe se “ky tur shërben për të kolauduar sa më saktë misionin dhe pozicionin aktiv si opozitë, për të shkëmbyer mendime, qëndrime dhe zgjidhje”. Kreu i PD-së ka dalë edhe me qëndrime programore që lidhen më shumë me zgjedhjet politike, por që në këtë rast po shërbehen si përvojë pozitive qeverisëse për shqiptarët.“Alternativa jonë është punësimi dhe zhvillimi. Ne jemi partia e taksave të ulta dhe inisiativës së lirë. Ne do të rrisim ndjeshëm investimet për bujqësinë dhe blegtorinë, trasportin ujor, peshkimin dhe industrinë e peshkut, do të rrisim investimet për turizmin”, tha Basha. Siç mund të vihet re, njësoj si në rastin e PS-së, gjëja e fundit që zbulojnë kryetarët janë ata që do kandidojnë, emrat pra, kur këta duhet të ishin ndër të parët që duhet të prezantoheshin. Qoftë edhe sikur për të vlerësuar nëse janë apo jo të aftë të çojnë përpara gjithë këto premtime.
s.z