Shënim: “Uragani i votave opozitare” ende nuk është shfaqur në radar…

Kompania italiane IPR-Marketing ka zhvilluar sondazhe në Shqipëri për televizionin Ora News në vitet 2009 e 2013, para zgjedhjeve dhe ditën e zgjedhjeve. Në 2009-ën, rezultatet e zgjedhjeve u përputhën saktësisht me rezultatet e sondazheve, dhe në 2013-ën, pothuajse u përputhën saktësisht në nivel koalicioni. Mbrëmë IPR-Marketing prezantoi ne televizionin Ora News rezultatet e para të sondazheve për tri bashki kryesore – Tiranën, Durrësin, Shkodrën.

Sipas IPR-Marketing, në qoftë se zhvillohen sot zgjedhjet në bashkinë e zgjeruar të Tiranës, 60% votojnë për koalicionin mazhoritar dhe 35.5% për koalicionin opozitar (4.5% për partitë jashtë koalicioneve). Me fjalë të tjera, koalicioni opozitar merr më pak vota se parvjet, aty ku votojnë çereku i zgjedhësve shqiptarë.

Në bashkinë e zgjeruar të Durrësit, koalicioni mazhoritar merr 57% të votave, ndërsa ai opozitar vetëm 41.5% të votave. Me fjalë të tjera, koalicioni opozitar merr më pak vota se parvjet në bashkinë e dytë të Shqipërisë.

Në bashkinë e zgjeruar Shkodër, koalicioni opozitar merr 55% të votave dhe koalicioni mazhoritar merr 43.5%. Me fjalë të tjera, vetëm në Shkodër koalicioni opozitar shënon përmirësim krahasuar me parvjet, por në këtë bashki të zgjeruar, votojnë vetëm 70 mijë zgjedhës.

E.Zaloshnja