Një shqetësim i E-zanit dhe një shënim i imi

Shqetësimi i E-zanit:

Faqja Respublica ka postuar një koment ku citon editorialin tonë këtu tek e-zani pas arrestimit të Genci Ballës, Bujar Hysës e disa prej pasuesve të tyre. Në një koment të lënë në fund të artikullit një komentues me emrin ‘fahriu’ thotë:

portalin ezani e ka zene belaja me keto arrestime. pse se pari shqiptari i pare nga jugu qe u vra ne Siri, ishte aktivist i ezanit. e dyta njerez te ezanit sikur armir taraj kane bere thirrje ne internet per xhihad ne siri. e per 2 vite me radhe ezani ka mbeshtetur xhihadin ne siri dhe ndryshoi faqe vetem pasi u pa qe perendimi ndryshoi planet e tija me sirine. perpara se besnik sinani, ergys mertiri, ervina hatibi – qe jeton ne turqi dhe i di levizjet e xhihadisteve shqiptare – te kritikojne imam Genci Ballen – ata duhet te bejne njehere autokritike publike perpara organeve te rendit publik per perfshirjen e tyre ne siri. organizata IHh  e cila con xhihadiste ne siri eshte promovuar nga ezani dhe biles edhe ka paguar hotelet dhe biletat per veprimtaret e ezanit kur ata kane shkuar ne turqi. pyetja qe ezani duhet te jap pergjigje eshte sesa eshte perfshire vete ne xhihadin sirian dhe pse ben keto reagime tani.

Ky koment nuk është i izoluar dhe në fakt është përsëritje e sulmeve të ngjashme bërë ndaj faqes sonë. Hapësira e komenteve është kthyer në hapsirë ku një faqe e njohur komunitare si e-zani.com sulmohet e akuzohet për gjëra nga më të ndryshmet, në këtë rast se ka kthyer faqen pas mbështetjes për xhihadin në Siri, se promovojmë shoqatën IHh e cila edhe paska paguar hotelet per veprimtarët e e-zanit kur kanë shkuar në Turqi, apo se aktivistë të e-zani.com kanë rënë në luftime në Siri.

Daullja e ‘fondeve’ që merr e-zani, ku sponsorët tanë thuhet se përfshijnë në kohë të ndryshme CIA-n, Shiat, Sorosin, Vëllazërinë Muslimane, tashmë edhe IHh është refren i vjetër.

Shihet gjithashtu se kjo faqe i atribohet Ervin Hatibit, Besnik Sinanit dhe Ergys Mertirit. Teksa Besnik Sinani dhe Ergys Mertiri shkruajnë këtu me emër e mbiemër, do e kishim për nder nëse Ervin Hatibi do ishte një nga administratorët apo kontribuesit e kësaj faqeje, por kjo thjesht nuk është e vërtetë, ashtu siç nuk është e vërtetë që – dhe kjo mund të vërtetohet kollaj – asnjëherë nuk kemi patur ndonjë qëndrim tjetër për sa ndodh në Siri, përveç atij që është shkruar këto ditë. Qartazi është gjithashtu shpifje se ‘aktivistë të e-zani.com’ kanë rënë në Siri, mbi të gjitha kur pikë së pari ne nuk kemi aktivistë, e rrjedhimisht ata që nuk ekzistojnë nuk mund të jenë as të rënë e as të ngritur.

Në rast tjetër do duhej injoruar ky koment si komente të ngjashme, si vjellje e cilësive më të mjera tek njerëzit. Por në fakt kemi arsye të besojmë që këto komente vijnë nga e njëjta autorësi që krjon herë pas here tension negativ mediatik: e njëjta autorësi që krijoi zhurmën patetike me gjeneral Lleshin, me forume fantazmë në Kosovë që celebrojnë rrëzimin e bustit të Nënë Terezës, i njëjti zë që krijon prej vitesh retorikë urrejtjeje fetare e etnike, nga katolikët tek vllehët.

Ky koment që kemi cituar më sipër akuzon e-zani.com për  veprime që janë ligjërisht të dënueshme sipas legjislacionit shqiptar. Duhet të ketë një limit ndaj kësaj vjelljeje e për këtë arsye e-zani.com po shqyrton nëpërmjet miqve juristë mundësinë që t’i kërkojmë faqes Respublica IP-në e këtij komentuesi e të ngremë padi ligjore për shpifje.

Përtej aspektit ligjor, shpifja ka një dimension fetar si një nga mëkatet më të urryera morale në Islam. Njerëz si këta vazhdojnë të veprojnë pikërisht ngase bashkësia nuk ka mbajtur qëndrimin e duhur censurues ndaj shpifësve të tillë dhe për këtë kushdo që nuk ka mbajtur qëndrim, vecanërisht udhëheqës fetarë, mbartin mëkatin e tolerimit dhe akomodimit të së keqes.

Shënimi im:

Unë e kuptoj dhe e mirëkuptoj shqetësimin e E-zanit përballë një komenti që bën insinuata të tilla, por pyes: Vetëm ndaj E-zanit ndodh një gjë e tillë? Apo është hera e parë që ndodh? U desh të ‘fanepset’ një internaut mistrec a rrugaç në respublica që të vihet alarmi?

Të gjithë e dimë se bota online në gjuhën shqipe është e mbushur me njerëz që nuk dinë të bëjnë gjë tjetër, veçse të shpifin e të mbjellin urrejtje. Edhe për respublica-n e për mua personalisht çfarë nuk thonë, madje shpesh herë edhe në faqet e respublica-s. Në mënyrë bajagi mazokiste ( duke lënë gojëhapur një pjesë lexuesish), ne kemi parapëlqyer të mos i censurojmë. E kemi bërë këtë edhe që të mos akuzohemi nga persona apo instanca publike (që pretendojnë se denigrohen në faqe të ndryshme, dhe nga lexues gjithfarësoji, të respublica-s) se përdorim dy njësi matëse për të njëjtën peshë.

Por problemi mbetet. Kjo që ndodh në botën online është e patolerueshme. E-zani, apo ndonjë blog tjetër online, si Peizazhe të Fjalës, e kanë gjetur zgjidhjen tek moderimi (respublica bën një moderim të pjesshëm; censuron thjesht llumin, ndonëse e dimë se llumi mund të përkufizohet në mënyra të ndryshme), por gazeta të tjera nuk gjejnë arsye ta bëjnë moderimin. Do duhej ta bënin, por nuk u leverdis ta bëjnë.

Mirëpo zgjidhja është vetëm moderimi, e jo ngritja e padive ndaj komentuesve që shkruajnë të fshehur pas identiteve virtuale. Ngritja e padive mund të funksionojë kur fenomeni është i izoluar, por jo në rrethanat kur kjo gjë është shndërruar në një flamë.