Fier, atentat biznesmenit 53-vjeçar të karburanteve

Një biznesmen karburantesh i ka shpëtuar mrekullisht një atentati. Ngjarja ka ndodhur ditën e enjte, por policia e ka mbajtur si informacion të rezervuar, për vetë mungesën e pasojave. Atentati ndodhi në aksin rrugor Fier – Patos, në lokalin e shitjes së karburantit pronë e 53 vjeçarit Namik Suli.

Persona të paidentifikuar i janë afruar pikës së karburantit me një makinë tip “Alfa Romeo” dhe kanë qëlluar me breshëri automatiku në drejtim të 53-vjeçarit Suli. Ky i fundit nuk është prekur nga plumbat por një klient në lokal është prekur shkarazi në qafë nga një plumb . Klienti ka marrë ndihmën mjekësore në spital dhe ndodhet në gjendje të mirë shëndetësore. Autorët janë larguar me shpejtësi nga vendi i ngjarjes.

Policia u vu në kërkim të tyrë por ka mundur të gjejë vetëm automjetin e braktisur në afërsi të fshatit Verbas. Automjeti u gjet i djegur plotësisht ndërsa brenda tij ishte edhe automatiku me të cilin autorët qëlluan drejt biznesmenit. Dyshohet që ngjarja të jetë vazhdim i një konflikti që ka shkaktuar vrasjen e vëllait të biznesmenit. Sulit afro dy vjet më parë. Neim Suli u vra nga fqinji i tij për konflikt pronësie.

Gëzim Sulo dhe dy djemtë e tij Endri dhe Ervis Sulo janë në burg dhe presin vendimin e gjykatës. Gjashte muaj pas vrasjes, vëllait të autorit iu vu tritol në makinë por ai dhe gruaja e tij dolën përpara se makina të shpërthente. Ngjarja nuk është zbardhur ende nga policia por dyshohet të kishte motive gjakmarrje.

Vrasja e Neim Sulit

Neim Suli 44 vjeç u vra në 10 Nëntor të vitit 2012. Gëzim Sulo dhe djemtë e tij Ervis dhe Endri Sulo u akuzuan për krimin pas konflikteve të vazhdueshme për tokën ku ishte ndërtuar servisi. Viktima Sula dhe fqinjët e tij që banonin në një pallat ishin në sherr për servisin shumë pranë vilës ku viktima jetonte së bashku me dy vëllezërit dhe nënën e tij. Ngjarja e rëndë ndodhi në orën 21.00 të mbrëmjes së 10 Nëntorit. Biznesmeni Suli u qëllua me armë zjarri automatik, duke hyrë për në banesën e tij. Ai ka qenë duke zbritur nga autovetura me targa TR 7835 C, që drejtonte, kur është përballur me breshërinë e automatikut. Ka mundur të largohet duke bërë disa hapa brenda në oborr, por është ndjekur pas dhe është qëlluar disa herë të tjera. Polica tha se një nga autorët e ka qëlluar edhe një herë në kokë viktimën, për t’u siguruar se ai kishte vdekur. 46-vjeçari pësoi vdekje të menjëhershme për shkak të plagëve të rënda të marra në gjithë trupin dhe në organe jetësore. Sipas policisë, ai u qëllua 11 herë.

Tritoli

Më datë 3 Maj 2013, në orët e para të mëngjesit, në aksin rrugor Fier – Lushnjë, në afërsi të fshatit Vajkan, një automjet “Skoda” me targa TR 2661 S me drejtues shtetasin Sulejman Sulon, 56 vjeç, banues në Fier i cili udhëtonte me bashkëshorten e tij Alie Sulon, ka shpërthyer duke u djegur plotësisht nga flakët. Si pasojë, u dëmtuan të dy personat që ndodheshin në mjet të cilët janë u dërguan në Spitalin Rajonal të Fierit dhe dolën jashtë rrezikut për jetën. Sulejman Sulo është vëllai i Gëzim Sulos, i akuzuar për vrasjen e Neim Sulit. Policia dyshoi për hakmarrje, por ngjarja nuk është zbardhur ende.

DITA