I vihet flaka librit të Fevziut

Libri më i ri publicistik i Blendi Fevziut “Enver Hoxha” është djegur të mërkurën në Ferizaj, nga përkrahësit e “Frontit popullor për kultivimin e veprës revolucionare të Enver Hoxhës”.

Ata vlerësuan se ky libër nuk përfaqëson asgjë tjetër, por një propagandë të egër kundër kësaj figure, që tashmë po bëjnë një grup i caktuar në Shqipëri, sikurse është nipi i Esat Pashë Toptanit - Blendi Fevziu.

Profesori i filozofisë, Remzi Hasani, në cilësinë e kryetarit të Frontit, fillimisht para të pranishmëve ka sjell dy libra, njërin të shkruar para 30 viteve nga 12 gazetarë të Tanjugut me titull “Shqipëria e Enver Hoxhës” dhe tjetrin, këtë të fundit të Blendi Fevziut.

Ai me këtë rast ka thënë se këto dy libra nuk dallojnë shumë ndërmjet vedi, ngase në fokus të shkrimit kanë pasur të njëjtin personazh.

“Dallimi qëndron në atë se para 30 viteve për Enverin shkruanin ata, të cilët e konsideronin si armikun numër një për shtetin jugosllav, ndërsa tash po bëhet nga një autor, i cili është ushqyer me propagandë dhe urrejtjeje për këtë figurë të ndritshme të kombit. Dallimi qëndron në atë se ky i dyti është shqiptar dhe është nipi i Esat Pashë Toptanit”, ka thënë Hasani.

Pasi ka dhënë një mori arsyesh, se pse duhet të digjet ky libër, fillimisht Hasani dhe bashkëmendimtarët e tij me kujdes i kanë mënjanuar nga kopertinat e dy librave, fotografinë e hartës së Shqipërisë me një bunker para dhe emrin e Enver Hoxhës, dhe më pastaj i kanë vënë flakën të dy librave.

Të djegësh një libër është një gjest i ulët, por Fevziut duhet t’i ketë pëlqyer kjo gjë, pasi është një mënyrë për t’i bërë jehonë një libri dosido, që po na fanepset dhe në gjumë nga teprimi promocional.

A.M.