Shitja e “Albpetrol”, favoritë azerbajxhanasit? Po ankandi?

Vizita e Kryeministrit Berisha në Azerbajxhan ka gjetur pasqyrim të gjerë në shtypin e sotëm dhe të gjithë kanë një argument: Thirrjen që kreu i ekzekutivit i ka bërë kompanisë shtetërore të naftës azere ‘SOCAR’ për të marrë pjesë në privatizimin e ‘Albpetrol-it’ si edhe lobimin për gaz-sjellësin ‘Trans Adriatik’, i cili fillesat i ka në fushat gazmbajtëse të “Shah Denizit”. Por e përditshmja “Shqip” shkon edhe më tej. Duke cituar Kryeministrin, ajo thekson se azerbajxhanasit janë favoritët kryesorë për blerjen e “Albpetrol”!!

Një deklarimi i tillë i kreut të ekzekutivit vjen jo në përputhje me përcaktimet e ligjit “Për privatizimin e Albpetrol-it”, i cili në fakt parashikon shitjen nëpërmjet një procedure të hapur me pjesëmarrjen e kompanive të specializuara ndërkombëtare. Nëse ligji përcakton se do të ketë një garë të hapur, pyetja është se si do të jenë azerbajxhanasit favoritë?! Megjithatë, eksperienca me privatizimin e kompanive të tjera strategjike ka treguar se lobingu politik ka mbizotëruar mbi kapacitetet menaxhuese dhe financiare të blerësve. 

S.E.