Dajçi, vetëm maja e ajsbergut të votave fiktive

Në një artikull të botuar në gazetën Tema, Rrok Rroku, kandidati për kryetar komune në Dajç, ka shpieguar me hollësi se si në kutitë e votimit në atë komunë u futën vota fiktive – pra, të njerzve që s’kanë qenë fare në Shqipëri në 8 majin e kaluar. Deri tani, Prokuroria e Lezhës ka çuar dosje penale në gjykatë vetëm për njërën nga kutitë e votimit.

Në artikullin e tij Rroku vë në dukje dy dallime mes rastit të Dajçit dhe kutisë së Ruzhdies, e cila u bë e famshme në zgjedhjet e 2009-ës.  Shkruan Rroku: “Dallimi i parë është se KQZ-ja nuk e kishte llogaritur rezultatin e  kutisë së Ruzhdijes në tabelën përmbledhëse të rezultatit  përfundimtar të qarkut të Fierit, ndërkohë që rezultati i Dragushës  është llogaritur në rezultatin përfundimtar të komunës  Dajç, edhe  pse në ankimimin e  bërë prej meje brenda afateve ligjore në KQZ dhe Kolegj Zgjedhor janë paraqitur fakte dhe  prova të pakundërshtueshme  të manipulimit në këtë kuti dhe kuti të tjera, fakte të cilat janë injoruar me një arrogancë të pashembullt  nga zotërinjtë  e shumicës  në KQZ dhe pastaj edhe nga Kolegji Zgjedhor. Dallimi i dytë është se në Ruzhdije është denoncuar një kuti, kurse në  Dajç unë kam paraqitur ankimim dhe denoncim për pesë kuti, manipulimi i të cilave ka sjellë falsifikimin e rezultatit përfundimtar të votimit. Në kutinë e hetuar prokuroria e ka gjetur plotësisht të mbështetur denoncimin tim. E siguroj opinionin publik të interesuar dhe popullin e komunës së Dajçit, në radhë të parë, se saktësia e provave të mia do të vërtetohet edhe në kutitë e tjera, të cilat prokuroria duhet t’i hetojë dhe gjykata duhet t’i gjykojë sipas ligjeve në fuqi.

Në fakt, një studim që kam kryer në vitin 2008 tregon se fenomeni i Dajçit është shumë i përhapur. Nëpërmjet modelit statistikor që përdora, bazuar në një kampion përfaqësues kombëtar prej 4000 vetësh, kam vlerësuar se rreth 100-150 mijë vota në rang vendi kanë qënë fiktive në periudhën 2001-2007. Siç kam shpjeguar në një shkrim të mëparshëm, http://respublica.al/opinion/2011/10/10/sa-duhet-te-shqetesohemi-per-identifikimin-e-votuesve), jo të gjitha votat fiktive kanë shkuar në favor të pozitës. Por, sidoqoftë, mund të thuhet se pozita (pavarësisht se kush ka qenë në pushtet), ka qenë më e favorizuara, përderisa përqindja zyrtare ka qenë gjithnjë më e lartë se përqindja e fituar realisht prej partive të pozitës.

E.Zaloshnja