AK-ja s’është më lajm elektoral; është lajm vetëm për njerëzit që e braktisin

Me pak përjashtime, gazetat dhe televizionet nuk informojnë për fushatën e AK-së. Por AK-ja vetë është bërë lajm këto kohë jo për ngjarje elektorale, por për ngjarje të një natyre tjetër. Është bërë lajm për braktisjen që po i bëjnë drejtues të ndryshëm apo për shkrirjen e anëtarësisë në qytete të caktuara. I fundit që e ka braktisur Spahiun është, sipas Temës online, Mystehak Xhemali, Sekretar për Kulturën dhe Artin në AK-në (sa shumë departamente paska pasur kjo lëvizje!). Ky i fundit në letrën e dorëheqjes thotë se nga partia është larguar truri dhe shtylla kurrizore e AK-së. Sipas tij, edhe pse është kërkuar një analizë për këtë rrjedhje, Kreshnik Spahiu ka deklaruar se nuk ka nevojë për komente e analiza. “Kjo përbën shkelje të zhvillimit normal të demokracisë së brendshme në parti, përbën devijim nga përgjegjësia e kryetarit të AK, i cili u shmanget kështu ballafaqimeve për çështje të  rëndësishme parimore,” thotë Xhemali.

Në fund, bën akuzën që kanë bërë dhe të tjerë, për të cilën Spahiu nuk është prononcuar: “Akoma më keq e tejet tronditëse kanë qenë deklaratat e herëpashershme të kreut të AK-së se po të merrte mandatin e deputetit, do ta shiste atë tepër shtrenjtë. Kjo, miqtë e mi, ishte e turpshme dhe neveritëse,” shprehet Xhemali, duke shtuar se AK-ja është shndërruar në PLK, ose Partia e Lekëve të Kreshnikut.

Re.Pu.