Gjinushi: LSI-në nuk e ndalon [asnjë kontratë] të ikë me PD-në pas zgjedhjeve. Është vetëm një rregull moral...

Në një intervistë për G.Sh., Skënder Gjinushi I rikthehet (pse jo dhe me pak nerv) çështjes së koalicionit me LSI dhe diskutimit që do duhej të quhej i mbyllur për çështjen e Kryeministrit. Në fund, ai rikthen dyshimin se LSI-në nuk e pengon askush që të ikë me PD pas zgjedhjeve.

“Kjo ka dy gjëra: Një bëhet për të rritur pjacën, (nivelin) është provokative. Pra LSI do të krijojë opinionin që LSI as nuk diskutohet që është në qeveri, del forcë e madhe, madje synon edhe postin e kryeministrit dhe me këtë jo vetëm që ul pjacën, por gënjen shumë më shumë njerëz që shiko se ne do krijojmë shumë pushtet, prandaj edhe premtimet e mëdha duhet të besohen. Edhe sloganin e ka Punësim, nuk thotë Punë për të gjithë, por punësim për ata që na votojnë ne. Ky është parimi. Ndërsa e dyta: Nuk është se thjesht e bëjnë për efekt elektoral, por e kanë ambicie. Është e njohur kjo lloj ambicieje dhe ngrohjeje e LSI-së...  Eshtë përdorur edhe në kohën e Nanos, kur thuhej unë kryeministër, ose e majta në opozitë dhe e realizoi. Po të përçash votat e majta e realizon se nuk është ndonjë gjë e madhe. Ca i përçamë edhe vetë ne në 2005 se përdorëm “Dushkun” në mënyrë të mbrapshtë dhe humbëm zgjedhjet duke fituar votë popullore. Të njëjtën gjë e përdor edhe tani. Ne kjo gjë nuk na ka pëlqyer kurrë. Një parti e dytë, e tretë apo e katërt nuk mund të ketë kurrë kusht kryeministrin, nuk mund ta ketë kurrë ambicie. Kryeministrin mund ta kenë ambicie partitë e vogla, vetëm kur ka një konsensus parazgjedhor, kur vetë koalicioni që është krijuar bie dakord të jetë “x”. Madje kjo lançohet dhe bëhet publike dhe fushata bëhet me atë kryeministër. (...) E keqja është se LSI këto pretendime të mëdha i ngre kur vjen në të majtë. Kurse kur shkon në të djathtë ai ul kokën, nuk ka kaq pretendime, pranon të rrijë edhe jashtë qeverie, madje pranon të rrijë edhe i pandehur”, shprehet ai.

Sa për deklaratat e Metës që “pas zgjedhjeve nuk do të kalojë me PD-në” Gjinushi mendon se për këtë “Nuk e ndalon askush. Është vetëm rregull moral. Ai moralin e ka shumë të fortë. Kështu që është i sigurt që kalon me PD-në. Ndaj them unë që duhet të rriten votat për PSD-në dhe të ulen ato për LSI-në”, mbyll Gjinushi.

k.c.