M. Nano: T. Papavrami e A. Sala nuk janë si ata [Sabiani, Elvana, Bleona, Genta, Greta etj] që pozicionohen për hononaret e koncerteve të Berishës

Në një shkrim të sotëm te Shqip, Mustafa Nano merr në optikën e tij marrëdhëniet e personaliteteve artistike me politikën. Ai, bën një paralele mes “djallëzisë” së PD për të tërhequr në vorbullën e fushatës Elhaida Danin, fill pas suksesit të saj në The Voice of Italy dhe Anri Salës e Tedi Papavramit, për të cilët Nano vëren “një mobilizim internautësh dhe tek-tuk kolumnistësh gazetash, për t’iu derdhur në mënyrë harbute [Tedi Papavramit e Anri Salës], ngaqë këta të dy kanë vendosur të mbajnë anë në këtë garë elektorale”

Për telefonatën e Berishës me Elhaidën, pompuar fort nga qeveria, Nano shkruan se “...gjëja më e palezetshme në atë njoftim, ishte fraza e fundit: Elhaida i uroi suksese Kryeministrit. Është një gjest i lig që këtë frazë të pafajshme, që me siguri është thënë prej saj në atë bisedë (është thënë si një urim cliché, që në shqip bëhet nga të gjithë. “Suksese!”, themi ne vend e pa vend), ta shndërrosh në një mesazh elektoral.”

Ndërsa për Papavramin dhe Salën, shkruan se “...nëse “fusin hundët” në tollovinë politike të Shqipërisë, nuk e bëjnë për një interes banal, nuk e bëjnë për honorare, si ato që marrin këngëtarët shqiptarë që shoqërojnë nëpër tubime Ramën, Metën e Berishën. E bëjnë, sepse kanë bindjen që duhet bërë. Mund të mos biesh dakord me qëndrimin e tyre, bën vaki që ky qëndrim të jetë i gabuar, por qëllimi i tyre është i mirë e i fisëm.”

Nano diferencon pozicionimin e tyre, sepse “Papavrami e Sala janë artistë, por nga ana tjetër janë dhe njerëz që, në ndryshim nga Sabiani, Elvana, Bleona, Genta, Greta etj., kanë edhe kokëçarje të natyrës publike, sociale, civike, politike, kulturore, globale etj. (...) kush i njeh e di mirë se ata janë kureshtarë, të etur për dije, lexojnë, informohen, kanë një optikë të tyren për gjërat e kësaj bote, kanë qëndrime të tyret mbi vlera, ngjarje, dukuri e zhvillime të caktuara.”

k.c.

(në foto: Tedi Papavrami me Ismail Kadarenë)

E plotë:

http://gazeta-shqip.com/lajme/2013/06/22/nga-elhaida-te-tedi-papavrami-e-anri-sala/