Deputetja Lama atakon Albin Kurtin për çështjen e shamisë dhe fesë në shkolla

Deputetja e Lëvizjes Vetëvendosje, Alma Lama (e lindur në Krujë, dikur reportere në kanalin televiziv TCH), ka shprehur pakënaqësinë e saj ndaj qëndrimeve të liderit Albin Kurti, të shprehura së fundi, pro mbajtjes së shamive fetare për femrat në shkolla, apo mësimit të fesë në institucionet arsimore laike. Por diferencat e saj me Kurtin nuk mbarojnë këtu. “Z. Kurti, i cili promovon idenë e bashkimit kombëtar hezitoi të thoshte një fjalë të vetme kundër atyre që përmes meje, si një shqiptare e lindur në Krujë, atakuan një pjesë të kombit tonë, e që është ajo që jeton në Shqipëri. Në Kosovë u përçmua edhe figura e Skënderbeut; pak kohë më parë është fyer edhe humanistja e botës, Nënë Tereza, nesër kushedi kush do të atakohet, sepse qëllimi është të na rrënohet identiteti kombëtar”, ka thënë Lama për gazetën Zëri, duke u distancuar haptaz ndaj këtij “pragmatizmi” të Kurtit.  A është kjo deklaratë një shpallje divorci, apo ftesë për reflektim, mbetet për t’u parë.

A.K.