Dy ministre që shkëmbejnë letra

Gazeta “Panorama” rrëfen sot për publikun një copëz nga komunikimi institucional mes ministres Milena Harito dhe ish-ministres së Integrimit, Majlinda Bregu. Kjo e fundit kërkonte sqarime mbi numrin e punonjësve të larguar nga puna dhe si duket në shkresë i ka shpëtuar një lapsus drejtshkrimor. Ministrja nuk ka munguar që të vërë në dukje në përgjigjen e saj pikërisht këtë gabim, për të pritur përgjigjen e Bregut sipas së cilës ministrja Harito është “analfabete funksionale”. Panorama e ka trajtuar me hollësi “argumentin”, ka dhënë faksimilet përkatëse, duke shtuar në fund edhe një epilog thuajse komik: Bregu i është ankuar kryetarit të Kuvendit Ilir Meta. Për t’i vënë emrin e duhur, nuk është e tepërt të thuhet se ky komunikim ka një ambalazhim disi femëror, që ngrihet mbi përmbajtjen e letrës në vetvete, e që në fakt është shqetësimi real. Na kujtohet të gjithëve sesi zhurmonte parlamenti nga sharjet në buzë të mikrofonit, aq sa u bë diçka normale. Ndaj edhe vjen kaq i ndryshëm, ky lloj i ri, epistolar,  i frymëzimit ndaj kundërshtarit.

s.z