Basha në “Sofrën Tiranase”: Tirana është e tiranasve dhe për tiranasit, do bëj gjithhçka për ta

Nga aktiviteti kulturor tashmë i kthyer në traditë, “Sofra Tiranase”, kryebashkiaku Lulzim Basha premtoi përfundimin e zgjatimit të bulevardit vitin e ardhshëm, veprës së tij më të bujshme dhe më madhore gjatë këtyre vjetëve në krye të bashkisë.

“Me 400-vjetorin e qytetit, vitin e ardhshëm, do të inaugurojmë përfundimin e punimeve dhe dyfishimin e aksit kurrizor të Tiranës së shekullit XXI”, deklaroi kryebashkiaku Basha. Zoti Basha tha se do t’i propozonte këshillit bashkiak vendosjen e një dite zyrtare të veçantë për t’u shprehur mirënjohjen familjeve autoktone tiranase.

Sakaq, pavarësisht se ekipi i futbullit i Tiranës ndodhet i fundit në klasifikim, kryebashkiaku Basha premtoi për t’i rikthyer lavdinë e dikurshme. “Sfida të vështira kemi boll përpara dhe një prej tyre është të rikthejmë bardheblutë e Tiranës në kampionë të Shqipërisë siç e meritojnë. Kjo është një sfidë e vështirë, por ju jap fjalën se kryetari i bashkisë nuk i harron kurrë premtimet e tij dhe së bashku me donatorët e rinj e të vjetër, do të bëjmë gjithçka për të kthyer ekipin e Tiranës atje ku e meriton”, premtoi zoti Basha.

Zh.