Zbardhet urdhri i ndalimit për Mark Frrokun: Rrezik për t’u larguar nga vendi, akuzohet edhe nga drejtësia belge

Sipas të përditshmes “Panorama” ndalimi i deputetit Mark Frroku, argumentohet në urdhrin e firmosur nga vetë kryeprokurori, Adriatik Llalla, në të cilin mes arsyeve të prangosjes së tij, renditet rreziku i largimit, vënia në rrezik e provave nga ana e deputetit kristiandemokrat dhe akuzat ndaj tij të prokurorisë belge. Në urdhrin e ndalimit për Frrokun, theksohet se qenia e lirë e tij mund të cenojë vërtetësinë e provave për llogari të hetimit. Pjesë e argumentit për masën e ndalimit është edhe lidhjet e rëndësishme financiare që deputeti Frroku ka jashtë Shqipërisë, duke kujtuar se ai disponon një shtetësi të dytë. Në urdhrin per Frrokun shkruhet gjithashtu se “ky deputet akuzohet nga organet e drejtësisë belge për kryerjen e disa veprave penale, akuza për të cilat aktualisht është në proces gjykimi në këtë shtet. Në këto kushte krijohen dyshime të arsyeshme se ai mund të largohet nga territori i Republikës së Shqipërisë, për t’iu shmangur ndjekjes penale”.