Vetëvendosje kundër marrëveshjes me serbët: “marrëveshje personale e Thaçit”

“Vetëvendosje” konsideron se marrëveshja e arritur dje në Bruksel është marrëveshje personale e Thaçit dhe ajo nuk duhet të bëhet edhe marrëveshje e Kosovës me Serbinë. Sipas partisë së udhëhequr nga Albin Kurti, me këto 15 pika Prishtina dhe Beogradi zyrtar ndajnë pushtetin dhe sovranitetin mbi Kosovën. Marrëdhënia ndërmjet shtetit të Kosovës dhe këtij Asociacioni serb që u formua nga Thaçi e Daçiç është e ngjashme me marrëdhënien ndërmjet shtetit të Bosnjës dhe Republika Srpska-s atje. Praktikisht, veriu i Mitrovicës po bëhet si Banja Lluka ndërsa Graçanica si Pale. Me këtë Asociacion nuk po i bashkohet veriu i Kosovës komunave të Ahtisaarit në jug të Ibrit por anasjelltas. Shteti i Kosovës nuk do të mund të funksionojë kështu, shkruhet në deklaratën (që Koha Ditore e quan kumtesë). Kundërshtimi i VV argumentohet edhe përmes faktit se Thaçi nuk ka raportuar  në Kuvendin e Kosovës as mbas pas takimit të tetë dhe as pas atij të nëntë në Bruksel (siç e do tradita më e mirë e autoritartizmit alla-shqiptarçe). Këto dy takime ishin më të rëndësishmet pasi që aty u bënë lëshimet më të mëdha serbëve. Ndërkaq, pas takimit të dhjetë Thaçi bëri dhe kompromisin e madh. Asnjë tekst asnjëherë nuk u publikua deri dje. Ftesën e Albin Kurtit dhe Komisionit për Punë të Jashtme të Kuvendit të Kosovës për të raportuar para tij, kërkesë e bërë më datë 11 shkurt 2013, Thaçi e ka injoruar prej dy muasjh, çka i jep VV të drejtën të akuzojë se ky është dialogu më jotransparent në historinë e Kosovës.       

k.c.