Topi nuk e refuzon apriori idenë e pjesëmarrjes në një koalicion qeverisës pas zgjedhjeve

FRD-ja ka shumë shpresa që të marrë një deputet (ndoshta dhe dy, thonë ca optimistë në radhët e saj) në qarkun e Durrësit, dhe këtë shpresë e bazojnë më së pari tek dy kandidatët e saj që janë të parët në listë: Gazmend Oketa dhe Sami Gjergji. Topi ka qenë dje në qarkun e Durrësit, më saktë në fshatrat e Durrësit, dhe aty, krahas mbështetjes që ka kërkuar për kandidatët e vet, ka lënë dhe një derë të hapur për pjesëmarrjen në një koalicion qeverisës pas zgjedhjeve. Është hera e parë që e hap këtë derë. “Ne nuk e mohojmë mundësinë për koalicion, por ato do bëhen sipas kushteve tona, nëse do të kemi numrat e nevojshëm për të negocjuar një gjë të tillë”, ka thënë ai dje në Xhafzotaj. Dhe po aty ka folur për oferta parazgjedhore, që ai i ka refuzuar: “kanë kërkuar bashkëpunimin tonë në këmbim të vendeve të sigurta në parlament, por ne nuk i kemi pranuar”.

Topi është nga të paktët udhëheqës partie që vijon të flasë me “ne”. Të tjerët flasin me “unë”.

Re.Pu.