"Tërësisht spekulativ, e krejt vulgar" - thotë Nano për titullin: "Rama, alamet çuni, Berisha, një gomar"

Mustafa Nano ka mbetur ligsht nga mënyra si është cituar disa ditë më parë në një rubrikë të së përditshmes Shqiptarja.Com. Bëhet fjalë për rubrikën “Lunch” të gazetares Mira Kazhani, ku disa ditë më parë një bisedë e gazetares me Nanon është botuar me titullin "Mustafa Nano: Rama alamet cuni, Berisha një gomar".

"Biseduam për afro një orë. Ishte një bisedë fare e shpenguar mbi temat që donte ajo. Vura re se nuk mbante shënime.. Kur mora gazetën të nesërmen në mëngjes, pashë se intervista ish njoftuar qysh në krye të faqes me një titull që më goditi: Muç Nano thotë se “Edi Rama është alamet çuni, ndërsa Berisha është gomar”. S’po u besoja syve. Mbeta ligsht. Ishte një titull tërësisht spekulativ, e krejt vulgar..."

Nga reagimi i Nanos, botuar sot në të përditshmen SHQIP, kuptohet që ai është kundër një mënyre të tillë editimi, ku citohen e pranëvihen në tituj, cepa fjalish të ndryshme e distante të një bisede të gjatë e gjysëm private. Dhe për atë që nxirret "në sipërfaqe" nga një bisedë e tillë e hallakatur në tema të ndryshme nuk mund të jetë autorja e një artikulli që vendos.

Nano rimerr dy "pjesët" e titullit Berishë-Ramë që gazetarja i ka vendosur artikullit-bisedë dhe shkruan:

"..nuk pretendoj të jem njeriu më elegant i botës, sidomos kur është fjala për Kryeministrin e vendit tim; përkundrazi, unë nuk është se e mbaj gjuhën kur vjen hera që flas për të, por puna është se qasjen time vulgare në publik duhet ta zgjedh unë, e jo Kazhanët e Shqipërisë. Shkurt, jam unë që duhet ta vendos se kur duhet ta them, e nëse duhet ta them, publikisht që “Berisha është gomar”, dhe në këtë pikë më vjen shumë çudi – kjo është e vetmja keqardhje – se si intervistuesja nuk ka pasur inteligjencën për të ndarë gjuhën e mejhanes nga gjuha publike. Por përsëris: Në këtë pikë nuk dua të dramatizoj më shumë se sa duhet. Është pjesa e parë e titullit që më shock-oi pa masë... Nuk arrija të kuptoja se si ka mundësi që gazetarët mund të bëjnë një spekulim kaq të trashë e të lig. Gjatë intervistës del e qartë ajo që kam thënë në përgjigje të pyetjes se ç’mendoj për Ramën. “Nuk dua të flas asnjë fjalë për Ramën deri në zgjedhjet parlamentare të vitit të ardhshëm; nuk dua të flas as mirë, as keq. Do të flas për të pas zgjedhjeve. Nëse i fiton këto zgjedhje e nëse bëhet kryeministër, do ta ndjek në çdo hap e në çdo akt me lupën time kritike”, i kam thënë gazetares, që më ka riprodhuar saktë mendimin. “Po nëse ai humbet zgjedhjet?”, pyet ajo. “Nëse ai humbet, askush s’do të ketë nevojë e arsye të merret me Ramën. Rama është alamet çuni, dhe është në gjendje të kuptojë se duhet ta lërë politikën e kreun e PS-së, nëse humb këto zgjedhje”, ia ktheva. Dhe pikërisht nga mesazhi im, se “Rama është alamet çuni, pasi do dhe di të largohet po humbi zgjedhjet”, gazetarja kish veçuar frazën “Rama është alamet çuni” për ta vënë në titull, e për të krijuar kontrastin e fortë me frazën tjetër timen “Berisha është gomar”. Ja, kjo është herë pas here gazetaria shqiptare. Gazetari e leshit! (Dhe kjo frazë e fundit është vulgare, por është vulgare se dua unë, e jo sepse do dikush tjetër.)" - A.N.

Në foto: Mustafa Nano, duke dhënë autografë gjatë promovimit të librit të tij “Hinterlandi i Kuq” (LSA)

Nano i plotë: http://gazeta-shqip.com/lajme/2012/10/24/kur-viktime-e-gazet...
Artikulli: http://www.shqiptarja.com/blogs/lunch_com/rama_alamet_uni_be...