Shenjë pjekurie, vendosmërie dhe civilizimi, protestuesit gdhihen para Kryeministrisë

Në pritje të qëndrimit zyrtar të Ramës, mijëra qytetarë në mbarë vendin po protestojnë për t’i thënë JO armëve kimike. Dhjetëra të rinj kanë qëndruar përgjatë gjithë natën në Bulevardin “Dëshmorët e Kombit” para Kryeministrisë, ndërkohë që në mëngjes iu janë bashkuar dhjetëra grupe qytetarësh, studentësh, nxënësish dhe aktivistësh të mbrojtjes së mjedisit. Mësohet se të gjitha gjimnazet e Tiranës nuk po zhvillojnë mësim gjatë ditës së sotme, ndërsa organizatorët thonë se sot në shesh pritet të mblidhen rreth 40 mijë persona.

“Jemi këtu për të pritur një JO. Në Shqipëri nuk duhet të futet asnjë gram sarin apo helme të tjera”,- deklaroi një ndër organizatorët e protestës.

Ndërkohë protesta po zhvillohen edhe në Durrës, Elbasan, Berat, Korçë,  Sarandë, Vlorë, Lezhë, Shkodër, Gjirokastër dhe Peshkopi.   Në Gjirokastër, nxënësit e shkollave kanë protestuar përpara bashkisë dhe kanë tentuar të futen në ambientet e institucionit. Policia ka ndërhyrë menjëherë duke shmangur incidente të mundshme.

Sot është paralajmëruar se në orën 17:00 shqiptarët që jetojnë në Nju Jork do të protestojnë në Time Square për të kërkuar dhënien e një përgjigje negative nga qeveria shqiptare për armët kimike të Sirisë.  Protestat janë paralajmëruar të zhvillohen edhe në Milano në orën 14:00.

Zh.