Shakaja e shqiptarit me bombë në tren, trondit Bavarinë

Shakara me bombë mund të bëhen në filma komedi si ai “Takim me prindërit” ku Ben Stiller i acaruar nga stuardesa, lemeris avionin. Por në jetën e vërtete këto janë “shaka me zarar”. Një shqiptar është arrestuar në stacionin hekurudhor në Emskirchen të Bavarisë, në Gjermaninë jugore. Fillimisht u transmetua si ndodhi e përnjimendtë, por ishte një shaka që i kushton tashmë arrestimin 35 vjeçarit. Në kohën kur faturinoja i kërkoi biletën të riut, ai duke treguar me gisht një çantë, bërtiti “bomba”. Sipas sat1bayern.de. u paralizua qarkullimi, policia nisi kontrollin dhe bëri transportin e 300 udhëtarëve me autobusë. Pas kontrollit nuk ka rezultuar asnjë rrezik, vetëm një shaka e tepruar, e mjaftueshme që shqiptari të shoqërohej në polici. Ai po merret në pyetje për shkeljen e qetësisë publike dhe për kërcënim me kryerje të një vepre penale. Nëse autori nuk kishte biletë, zgjodhi rrugën e gabuar për të dalë nga situata.

a.k