Shënim: Ja pse asnjë forcë politike e Tiranës nuk mund të jetë Vetëvendosje!

Vazhdimisht lexuesit e Respublica-s komentojnë dëshirën (përzier me pezm) që nuk kemi një “Vetëvendosje!” edhe në Shqipëri. Arsyeja gjendet në të gjitha veprimet politike të Vetëvendosje!-s, lëvizje që kërkojnë guxim politik dhe ndjeshmëri qytetare.  Shembulli më i fundit është ky i sotmi, kur lëvizja ka dalë në Kosovë kundër lojërave të fatit.

Një fenomen brejtës i shoqërisë shqiptare - shembulli më konkret i depresionit moral, shoqëror e ekonomik të Shqipërisë (e Kosovës) - kumari është një fenomen që zhvillohet nën sytë e të gjithëve, por që asnjë forcë politike bën sikur nuk e sheh. Gjasat janë që nuk duan të “kapen” me të sepse fijet lidhëse mes politikës dhe biznesit shkojnë shumë thellë, deri atje ku nuk ka fort dritë. Ndaj, mos prisni që shembullin e vetëvendosjes (në këtë rast) si edhe në raste të tjera ta ndjekë cilado parti në Tiranë (e për ironi, as neokomunistët).

Ja disa pjesë nga deklarata e Vetëvendosjes kundër operimit të lojërave të fatit (në Kosovë):

“Përkundër faktit se këto kompani operojnë në kundërshtim me ligjin, Qeveria e Kosovës i ka pajisur ato me licensa. Në këtë mënyrë, pra përmes favorizimit të paligjshëm, kjo Qeveri ka krijuar një kontekst ku bixhozi po përhapet si epidemi. E kjo epidemi më së shumti i prek nxënësit, si dhe shtresat më të ndieshme sociale, që manipulohen nëpërmjet joshjes së fitimeve të lehta dhe të shpejta, e që në fakt rezultojnë kryesisht vetëm me humbje të sigurta”.

“Është shokues fakti se nenet 60, 66, 70 dhe 72 të Ligjit për Lojërat e Fatit, në të cilat definohen kushtet për licensim të ndërmarrjeve në fjalë, më shumë shkelen se sa respektohen nga vetë ATK-ja, që është agjensia përgjegjëse pikërisht për të garantuar zbatimin e ligjit. Afërsia e drejtpërdrejtë e lojërave të fatit me shkollat, institucionet historike e fetare apo pronat komunale tashmë nuk është ndonjë ngjarje e rrallë, por një dukuri e përgjithshme, edhe pse ligji e ndalon këtë gjë shprehimisht. Shumica dërrmuese e kazinove dhe bastoreve duket se e kanë strategji biznesi afërsinë me shkollat, sepse me sa duket i konsiderojnë fëmijët si klientët kryesorë”.

K. Cukali