Pse Rama e Kokëdhima nuk pranojnë të komentojnë deklaratat e Blushit? Kryeministri dhe të tijtë kanë komoditetin të përgjigjen sipas dëshirës

A është mungesë përgjegjësie para publikut refuzimi për të komentuar qëndrimet kritike  që një deputet i Partisë Socialiste dhe për më tepër një anëtar i kryesisë së saj ka shprehur ndaj qeverisjes së vendit? Në dy prononcime mediatike si kryeministri Rama ashtu dhe deputeti Koço Kokëdhima kanë dhënë të njëjtën përgjigje: “Nuk dua të komentoj deklaratat e Blushit”. E para dhe më e pakta kjo do të thotë t’i shmangesh debatit dhe akuzave që një deputet i mazhorancës ngre për qeverisjen e vendit. Nëse kritikat e Blushit nuk qëndrojnë, këtë kryeministri mund të na e shpjegojë me argumenta në përmbushje të detyrimeve që ka si kryetar I qeverisë, pasi në këtë rast nuk bëhet fjalë për pikëpamjet e tij personale për deputetin Ben Blushi, por për shqetësime që lidhen me të ardhmen e qytetarëve. Me lehtësinë më të madhe si kryeministri, si deputeti Kokëdhima apo dhe funksionarë të tjerë të Partisë Socialiste që nuk shohin probleme në qeverisjen e vendit proklamojnë komoditetin për të mos u përgjigjur. Kokëdhima u shpreh në “Opinion” se është i gatshëm t’i përgjigjet pyetjes së çdo qytetari,  por nga ana tjetër nuk pranon të flasë për qëndrimet e Blushit, duke treguar se ndjeshmëria ndaj qytetarëve mbetet sërish në kuadrin e populizimit. Për aq kohë sa ushtrojnë funksione publike nuk mund të  jetë në dëshirën e tyre përgjigjia për kritikat.  Shqetësimet që shfaq publikisht një politikan karriere, një ish-ministër dhe një deputet që ka treguar se di ta justifikojë mandatin si i zgjedhur vënë para përgjegjësisë qeverinë dhe kreun e saj. Kritikat e Blushit mund të mos qëndrojnë, por këtë duhet ta vlerësojë publiku. Kryeministri dhe të tjerët duhet të japin shpjegimet që u takojnë dhe të mos e trajtojnë qeverisjen si zyrë personale.

l.mitro