Projektligji “Për Investimet Strategjike”, klasifikohen sektorët dhe kriteret. Për sektorë si energjia, minierat, transportet dhe turizmi, investimet duhet të jenë nga 5 mln euro deri në 50 mln euro

Qeveria ka depozituar në Kuvend, në datën 26 mars 2015, projektligjin “Për Investimet Strategjike”. Mund të veçohet në këtë projektligj të rëndësishëm neni 8, që bën klasifikimin e sektorëve strategjikë që janë: Sektori energjetik dhe minerar; sektori “Transport, infrastrukturë e komunikimeve elektronike dhe mbetjet urbane”; sektori “Turizëm (Strukturat turistike)”; sektori “Bujqësi (Ferma e madhe bujqësore) dhe peshkim”; sektori “Zona ekonomike” dhe Zona me përparësi zhvillimi. Po kështu në këtë nen përcaktohen edhe kriteret për t’u kualifikuar si investitor strategjik, ndarë sipas procedurave; me asistencë, apo me procedurë të veçantë. Vlera e investimit për çdo sektor, në mënyrë që investitori të quhet strategjik është: Për sektorin energjetik dhe minerar dhe nënsektorët: i barabartë ose më i madh se 30 000 000 (tridhjetë milionë) euro, për investitorët/projektet që do të përfitojnë statusin “Investim/ investitor strategjik, procedurë e asistuar”; i barabartë ose më i madh se 50 000 000 (pesëdhjetë milionë) euro, për investitorët/projektet që do të përfitojnë statusin “Investim/investitor strategjik, procedurë e veçantë”. E njëjta vlerë ruhet edhe për sektorin “Transport, infrastrukturë e komunikimeve elektronike dhe mbetjet urbane”. Për turizmin shifrat ndahen në 5 000 000 (pesë milionë) euro, që në të njëjtën kohë krijon, minimalisht, 80 vende të reja pune dhe 50 000 000 (pesëdhjetë milionë) euro, për investitorët/projektet që do të përfitojnë statusin “Investim/investitor strategjik, procedurë e veçantë”. Për variantin e dytë edhe në sektorin e Bujqësisë dhe “Zona ekonomike” mbahet vlera 50 000 000 euro. Po kështu përmes këtij projektligji krijohet edhe Komiteti i Investimeve Strategjike që do të drejtohet nga kryeministri me përbërje, ministrat përkatës sipas sektorëve.
s.z