Preç Zogaj: Reagimet ndaj Kokëdhimës janë shprehje e rëndësisë, dhe jo e vogëlsisë së tij

Janë të shumtë ata që e kanë thënë të vetën lidhur me ngjarjen “Kokëdhima”. Sot e thosh të vetën dhe Preç Zogaj, që ka një njohje të hershme me botuesin e Shekullit, në një intervistë për Mapon. Dhe fillimisht e lidh këtë zhurmë rreth Koços me rëndësinë që ka ky i fundit, e jo me vogëlsinë: “[Koço] gjithnjë më kishte thënë se nuk do të hynte ndonjëherë në politikën aktive, por që ishte gjithnjë aty afër, këtë e kanë ditur të gjithë. Koços i uroj të ketë hyrë me këmbë të mbarë dhe i them miqësisht të tregojë durim, të përballojë me qetësi reagimet dhe opinionet e ndryshme për kandidimin e tij, që janë shprehje e rëndësisë dhe jo e vogëlsisë së tij”.

E pastaj vijon duke dhënë një konsideratë për të si biznesmen e si botues: “Koçoja nuk është as i pari, as i fundit botues dhe biznesmen që zbret në politikë. Mua nuk më habit kjo gjë. Madje në rastin e Koços më vjen mirë, pasi ai është një biznesmen i kultivuar, një person inteligjent, i moderuar, që ka futur i pari institucionin e etikës në shtypin e shkruar. Nuk e di si i ka sot punët e biznesit, por hyrja e tij në politikë futet në lajmet e mira për të majtën dhe për politikën në tërësi. Ai është i tillë edhe kur e ke përballë, edhe kur e ke përkrah. Ndërkaq, po t’i referoheni librit tim të fundit ‘Në kërkim të zgjedhjeve të humbura’, do të shikoni se Koço ka qenë personi që ka ngulmuar me shumë se askush për moskandidimin e Ramës në Tiranë në zgjedhjet e vitit 2011. Marrëdhëniet e tij me Ramën pas kësaj pësuan një thyerje ose ngrinë. Duhet të jenë shkrirë kohët e fundit.”

Re.Pu.