PD kallëzon penalisht ministrin e Brendshëm për çështjen “Doshi”: Shpërdoroi detyrën, fshehu krimin dhe pengoi zbulimin e së vërtetës

Partia Demokratike ka depozituar sot një kallëzim penal për ministrin e Brendshëm, Saimir Tahiri dhe kreun e përgjithshëm të Policisë së Shtetit, Artan Didi. Ky kallëzim erdhi një ditë pasi Prokuroria për Krimet e Rënda nisi marrjen e dëshmive të personave që kishin dije për akuzat e deputetit të Shkodrës Tom Doshi. Në një deklaratë për media, pas depozitimit të kallëzimit, deputeti i PD­së, Arben Ristani ka bërë me dije se në këtë kallëzim, Tahiri akuzohet për shpërdorim të detyrës, fshehje të krimit të planifikuar dhe pengim të zbulimit të së vërtetës. “Është një ngjarje shumë e shëmtuar, por e denjë për bandën që kemi në pushtet. Tahiri nuk ka kryer veprime si shtetar, por tamam si shok i bandës, i cili ulet me njerëz me precedentë penale që dyshohet se janë porositur për vrasje”­ tha ai, Sipas Ristanit, takimet janë bërë fillimisht jo në ambiente zyrtare, ndërkohë që më pas Tahiri, sipas tij, deklaroi vetë se është ai që ka bërë hetimet, jep në fund edhe vendimin, por kjo nuk është normale. “Kallëzimi është vërtetë do punë e cilësi në hetim për të provuar nëse kreu i kuvendit ka porositur vrasjen, por është hetim formal nga pikëpamja e procedurës që duhet ndjekur se ministri ka shpërdorur detyrën, nuk ka kallëzuar krimin dhe ka penguar zbulimin e së vërtetës”­ tha ai.