Padia ndaj Imamit për fondet: Reklama, karburant dhe fushatë

Padia e Ministrisë së Mbrojtjes ndaj ish-ministrit Arben Imami, e dorëzuar dje në Prokurorinë e Përgjithshme, si element kryesor por jo të vetëm të akuzave për "Shpërdorim detyre", "Shpërdorim i kontributeve të dhëna nga shteti", si dhe "Shkelje e barazisë së pjesëmarrësve në tender apo ankand publik”, ka një tender reklamash me vlerën 1.2 milionë USD.

"Në kundërshtim me ligjin, paratë e MEICO-s i shpenzuat për spote publicitare dhe aktivitete sportive në shumën 120 mln lekë të reja", ka thënë më herët ministrja Kodheli. Sipas ministres vetëm në periudhën maj-qershor 2013 u harxhuan 62 mijë litra karburant. Gjithashtu para zgjedhjeve të 23 qershorit ishte deputeti socialist Taulant Balla, që në një dalje publike akuzoi ish-ministrin Imami për shpërdorim fondesh publike për fushatë, në favor të Partisë Demokratike në pushtet.

Përpara kësaj padie, PS kishte njoftuar se kishte depozituar në prokurori një denoncim për abuzimin me reklamën shtetërore në shifrën 16 milionë dollarë gjatë 5 vjetëve të fundit. Gjithashtu, edhe nënkryetari tjetër i grupit të PS-së, Erjon Braçe, në një nga publikimet e tij pati bërë të ditur se, reklama e Ministrisë së Mbrojtjes, e shfaqur nëpër TV ka kushtuar 1 miliard lekë të vjetra vetëm për një muaj fushatë elektorale. Edhe një nen tjetër i Kodit Zgjedhor shkelet me këtë rast, përkatësisht neni 84 e ndalon qartësisht përdorimin e fondeve publike për reklama dy muaj para zgjedhjeve.

a.k