Një mesazh nga takimi i Metës me prokurorin kroat. Shqipëria nën shembullin e Kroacisë, arrestimi i ish-kryeministrit i hapi rrugë integrimit në BE. A është sinjal për Berishën?

Në kulmin e debatit politik mbi dekriminalizimin dhe dilemën nëse do të arrestohen dy deputetët  Mark Frroku e Tom Doshi për të cilët prokuroria ka kërkuar heqjen e imunitetit, kryetari i kuvendit Ilir Meta sheh si të nevojshme intensifikimin e luftës kundër korrupsionit sipas shembullit që ndoqi Kroacia para anëtarësimit në Bashkimin Evropian. Një proces që u parapri nga arrestimi për korrupsion i ish-kryeministrit kroat Ivo Sanader ne vitin 2010, eksperincë që kreu i kuvendit Ilir Meta e sheh si të dobishme për suksesin e Shqipërisë në këtë drejtim.  Në takimin që ai pati me kryeprokurorin e Kroacisë u vu theksi pikërisht tek eksperienca kroate në këtë drejtim, çka mund të përbëjë model suksesi edhe  për Shqipërinë.  “Jemi në të njëjtin rajon dhe mund të marrim eksperiencë nga Kroacia. Reforma në sistemin e drejtësisë është një prioritet për vendin tonë. Lufta kundër krimit të organizuar dhe korrupsionit është prioriteti ynë në radhë të parë dhe në kuadër të procesit të integrimit evropian. Eksperienca kroate në procesin e integrimit në Bashkimin Europian duhet të shërbejë si një rrugë suksesi për ne”- ka theksuar Meta në këtë takim. Në njoftimin e zyrës së kryetarit të kuvendit thuhet se Meta shprehu mbështetjen për forcimin e shtetit ligjor dhe të institucionit të Prokurorisë, ndërsa Dinko Cvitan shprehu gatishmërinë e Kroacisë për të kontribuar me eksperiencën dhe ekspertët e saj për të ndihmuar në forcimin e shtetit ligjor dhe në rrugën e Shqipërisë drejt Bashkimit Europian. A është ky një sinjal për ish-kryeministrin Berisha? Mbetet të shohim si do ta lexojë Prokuroria këtë këndvështrim që ka shpalosur kryeparlamentari Meta për luftën kundër korrupsionit.

l.m