Një gazetare egjyptiane heq shaminë në trasmetim live; përballë kish një imam

Televizioni egjyptian al-Nahar ka transmetuar një intervistë që gazetarja dhe moderatorja Riham Said i ka marrë një kleriku, imamit Yousuf Badri. Dhe aty ka ndodhur një ballafaqim i pazakontë mes të dyve. Gazetarja, pak para regjistrimit, ish duke folur me imamin, dhe nuk mbante shami mbi kokë. Imami nuk ishte i shqetësuar nga ky fakt. Madje, bisedonte me të duke ia ngulur shikimin në kokërdhok të syrit. Në momentin që po fillonte regjistrimi, imami i kërkoi të vinte shaminë. Nisi në këtë moment një ballafaqim, që vijoi edhe në transmetimin live mes të dyve, ku vajza i kërkonte të dinte “pse atij nuk i kish bërë përshtypje fakti që para regjistrimit ajo ish pa shami, dhe pse ia kërkonte këtë gjë veç gjatë regjistrimit”. Imami këmbëngulte që ajo të vishte velin, por gazetarja kërkonte prej tij që të shpjegonte shtirjen e hipokrizinë, me fjalë të shpjegonte qëndrimin e shpenguar me kamera të fikura përballë një vajze të zbuluar, e pastaj qëndrimin fanatik me kamera të ndezura. Ishte argëtuese situata, në të cilën, në sytë e kamerave, imami namusqar mbante sytë në një drejtim tjetër, i vendosur për t’mos ia hedhur sytë gazetares së zbuluar. Derisa në fund, gazetarja e hoqi fare hijabin, dhe po e mbante në dorë në një formë të shkujdesur. Debati u mbyll nga vajza, e cila u çua dhe u largua nga studioja.

Skenën mund ta shihni në versionin video në rubrikën tonë të ‘video-lajmit”, në kolonën multimediale në të djathtë të faqes sonë web.

Re.Pu.