Mijra emra të dubluar dhe pa adresë në listat zgjedhore; por socialistët japin garanci se e kanë situatën nën kontroll

Socialistët kanë denoncuar problemet me emrat e dubluar dhe me ata pa adresë të saktë zgjedhore. “Ekspertët tanë përfundimisht kanë nxjerrë një shifër prej 25 874 shtetas të dyshuar si të dubluar në listat zgjedhore për zgjedhjet e 23 qershorit. Problematika e dytë serioze që lidhet me listën e zgjedhësve ka të bëjë pikërisht me ata zgjedhës që ende figurojnë sot në listën e zgjedhësve pa një adresë të saktë zgjedhore“, ka thënë Bledar Çuçi.

Janë shifra që ta bëjnë manipulimin një lodër fëmijësh, por eksperti për problemet zgjedhore, Çuçi ka evituar tonet dramatike. Ai ka dhënë garanci se PS-ja është në gjendje të bllokojë zgjedhësit e dubluar që të votojnë më shumë se njëherë: “PS-ja e ka të gjithë informacionin e detajuar të 25 874 zgjedhësve të dyshuar si të dubluar në lista se ku ndodhen, ku janë të regjistruar fiktivisht, kush e ka marrë dokumentin e identitetit, në çfarë qëndre votimi janë të regjistruar dhe cilës familje i përkasin si të dubluar. Ne kemi informacionin e plotë dhe garantojmë që asnjë nga këta zgjedhës nuk do të kenë mundësi që në datën 23 qershor të votojë më shumë se një herë, për shkak të të qenurit të tyre si të dubluar në listën e zgjedhësve”.

Re.Pu.