Gara për Tiranën/ Basha kandidon Halim Kosovën - Gara për Durrësin/ PD nuk i bën lëshime republikanëve, kandidon Grida Dumën

Sipas gazetës Panorama” PD pritet të bëjë publike kandidaturën e së djathtës për bashkinë e Tiranës. “Panorama” shkruan sot se pas disa sondazheve të zhvilluara në Tiranë, ku PD­ja testoi fillimisht 10 emra dhe më pas duke i reduktuar në katër emrat më të kuotuar, mjeku i mirënjohur Halim Kosova ka rezultuar si një prej më të mbështeturve në Tiranë. Halim Kosova, Grida Duma, Jorida Tabaku dhe Besnik Aliaj kanë qenë katër emrat më të kuotuar nga lista e propozimeve të ardhura prej 11 degëve të PD­së në Tiranë. Kontributi që ka dhënë Kosova si mjek, por dhe si ish-drejtues i spitalit “Mbretëresha Xheraldinë” ka bërë që ai të ketë mbështetjen më të madhe për të sfiduar për një mandat në Bashkinë e Kryeqytetit. Por, edhe rezultatet e Kosovës në organizimin e zgjedhjeve në njësinë 5 që konsiderohet bastion i së majtës, kanë rritur mbështetjen e PD­së për kandidaturën e tij.

Gjithashtu “Panorama” thotë se e zgjedhura e Partisë Demokratike në Durrës është Grida Duma. Për këtë qytet “Panorama” shkruan se janë zhvilluar 5 sondazhe brenda tri javëve për të parë se cili prej kandidatëve të propozuar kishte mbështetjen më të madhe te votuesit e bregdetit. Sipas “Panoramës” mësohet se në sondazhe u përfshinë Grida Duma, Arqile Gorea dhe Ardian Muka. Paralelisht me to janë zhvilluar dhe sondazhet prej kandidatit të propozuar prej Partisë Republikane Agron Duka. Ndërkohë që Duma rezulton të ketë pasur një mbështetje dhe më të madhe nga dy kandidatët e tjerë të PD­së. Në një prononcim për mediat, Grida Duma ka vlerësuar formën e zgjedhur nga partitë në përzgjedhjen e kandidatëve. “E vërteta është se më në fund jemi në një moment kur politika shqiptare po bën atë që bën politika perëndimore, po dëgjon qartazi jashtë konfliktit subjektiv mesazhin e votuesve”, tha Duma. Ndërsa në lidhje me kandidimin e saj ajo tha se “ky është një vendim në grup, përgjigjen unë do ta kthej vetëm kur kryetari i partisë sime të jetë në ato diskutime. Kjo është një situatë e brendshme dhe përgjigje e brendshme”.