Don Marian Paloka flet në “Tonight Ilva Tare”: Bashkëjetesa ndërfetare jo kulturë por një instinkt shumë i çmuar i shqiptarëve

Don Marian Paloka që shërben si famullitar në Fiesole të Firences, gjatë një interviste për “Tonight Ilva Tare”, flet për një mirëkuptim të shkëlqyer instiktiv midis komuniteteve të mëdha fetare. “Harmonia fetare nuk është rezultat i angazhimit të marrëveshjeve diplomatike ndërmjet krerëve fetarë, por është një bashkëjetesë e natyrshme normale e anëtarëve të ndryshëm fetar në mjediset e natyrshme të jetës së përditshme”, thotë ai. Sipas Don Marian Palokës Shqipëria nuk ka pasur luksin të zhvillonte kulturën e bashkëjetesës ndërfetare të kuptuar si reflektim mbi këtë vlerë. “Vlera ka ardhur në mënyrë spontane dhe instiktive dhe e tillë  është. Ndoshta tani ka ardhur çasti, në të cilët janë kushtet historike dhe shkalla e edukimit popullore, që të na lejojë të zhvillojmë edhe kulturën e bashkëjetesës ndërfetare. Deri tani, unë mendoj se nuk ka qenë kjo kulturë, por ka qenë thjesht fenomeni instinkti i bashkëjetesës ndërfetare. Është një instinkt shumë i çmueshëm sepse shpesh herë mund të jetë kultura e bashkëjetesës fetare, por kjo kulturë ushtrohet si disiplinë dhe jo si zgjedhje e natyrshme. Ne shqiptarët kemi fatin e madh që të kemi qëndrimin e natyrshëm përpara reflektimit mbi këtë qëndrim”, tha Don Marian Paloka në “Tonight Ilva Tare”.