Bulqizë, grevë urie dhe pezullim lejesh minerare. Gjiknuri minatorëve: Mos u keqpërdorni

Ministri i linjës Damian Gjiknuri,  ka bërë të ditura sot rezultatet e inspektimit në zonën krom-mbajtëse të Bulqizës: janë pezulluar 29 leje minerare (përfshi ACR-në), janë revokuar pesë leje dhe është vendosur që në zonën D të mos punohet për shkak të rrezikut të madh për jetën. Por pikërisht për këtë pezullim, rreth 60 minatorë të zonës D kanë nisur një grevë urie, duke kërkuar rifillimin e punës në këtë galeri. Mësohet se minatorët kanë tentuar të nisin punën mëngjesin e sotëm, por janë ndaluar nga policia private. Ata kanë hyrë me forcë në ambientet e gardërobës, në hyrje të minierës, duke kërcënuar se do të qëndrojnë atje deri kur të lejohen të rifillojnë punën. Minatorët thonë se nuk e dinë arsyen përse policia private nuk i lejoi të futeshin në galeri. Gjiknuri deklaroi lidhur me këtë protestë, se minatorët po keqpërdoren nga pronarët privatë, ndërkohë që nga kushtet e pasigurta teknike kanë humbur jetën disa kolegë të tyre.
a.k