Basha prezanton Halim Kosovën si kandidatin e PD për Bashkinë e Tiranës. “Zgjodhëm mjekun që duan qytetarët”

Kryetari i Partisë Demokratike, Lulzim Basha ka prezantuar sot kandidatin zyrtar të PD për Bashkinë e Tiranës, mjekun e njohur, Halim Kosova.  Sipas Bashës, “ne dëgjuam zërin e qytetarëve, që duan mjek në Bashkinë e kryeqytetit dhe jo politikanë. Kosova është kryetari i ri i Bashkisë së Tiranës”. Në takimin më herët me deputetët e qarkut të Tiranës është diskutuar për strategjinë e selisë blu në zgjedhjet e 21 qershorit. Në këtë takim kanë marrë pjesë Halim Kosova, Grida Duma, Jorida Tabaku dhe Besnik Aliaj, emra të cilët kanë qenë më të kuotuar nga lista e propozimeve të ardhura prej 11 degëve të PD-së në Tiranë. Kontributi i mjekut Kosova si mjek, por dhe si ish-drejtues i spitalit “Mbretëresha Xheraldinë” ka bërë që ai të ketë mbështetjen më të madhe brenda Partisë Demokratike, për të sfiduar kundërshtarin e majtë në zgjedhjet për Bashkinë e Tiranës.