“Opinion”, gazetari Artan Hoxha: “Durim Bami dhe Enver Stafuka, të dyshuar për çështjen “Santo”. Bami është mbajtur në përgjim deri në shtator 2014”

Në emisionin “Opinion” gazetari Artan Hoxha ka deklaruar se deri në muajin shtator të vitit 2014, shtetasi Durim Bami, i akuzuar kryesor në çështjen “Doshi” dhe personi i zhdukur, Enver Stafuka, janë mbajtur në përgjim nga policia si të dyshuar kryesorë për vrasjen e bankierit Artan Santo. Gazetari tjetër, Spartak Koka, ka shtuar se janë edhe 6 persona të tjerë të mbajtur në përgjim policor. Nuk dihet si do administrohen këto informacione që po bëhen publike e për të cilat prokuroria ka dijeni. Sipas Hoxhës, përgjimi është ndërprerë sapo ka nisur aktivizimi i deputetit Doshi që dyshonte se po përpiqeshin ta vrisnin, çka i jep kuptim krejt tjetër qëndrimeve kontradiktore që kanë mbajtur për çështjen “Santo”, ministri i Brendshëm Saimir Tahiri dhe ish-drejtori i Përgjithshëm i Policisë, Artan Didi. Ky i fundit është shprehur së fundmi se ka përparime për çështjen “Santo”, kurse Tahiri është shprehur për “ngecje të hetimeve”.