“Dialektika” Rama-Meta: Të dy hedhin vickla, dhe të dy nuk ia marrin për të madhe shos-shoqit

Ka mbetur disi enigmatike sms-ja e Ramës dërguar disa miqve të vet ‘preferencialë’, me anë të së cilës bëheshin me dije këta të fundit mbi rezultatet e një sondazhi të bërë nga socialistët (këtë e kanë raportuar shumë gazeta, duek publikuar dhe tekstin). Sipas sms-së së publikuar, PS-ja dilte fituese në Tiranë, dhe merrte 18 mandate, ndërsa LSI-ja dilte pa gjë.

Meta nuk i ka dhënë peshë këtij lajmi. Ose është shtirur sikur nuk i jep peshë. Në një intervistë dhënë Aleksandër Furrxhiut në televizionin AS, ai tha se “nuk ekziston asnjë dëmtim ndaj LSI-së nga çdo lloj mesazhi dhe nga çdo lloj sondazhi që mund të porositet…. [Sondazhet e të gjitha llojeve] janë tepër momentale dhe kalimtare. Mendoj se ndikimi i madh [në elektorat] vjen nga mesazhi që një parti apo një lider përcjell dhe lë në mënyrë të qëndrueshme te votuesi. Dhe në këtë drejtim mendoj se marrja me një detaj të tillë është një humbje kohe dhe unë kam komunikuar me zotin Rama gjatë këtyre ditëve për çështje të ndryshme, por nuk e kam menduar të komunikoj për një gjë të tillë. Çështje të tilla për mua janë të parëndësishme”.

Reagim i shtruar, s’ke ç’thua. Në fakt, Rama e Meta po tregohen të kujdesshëm në reagimet ndaj provokimeve që i bëjnë njëri-tjetrit (Meta ka provokuar e provokon me “ambicjen për t’u bërë kryeministër”), dhe nuk kuptohet pse nuk janë aq të kujdesshëm sa të mos i bëjnë fare këto ngacmime.

Re.Pu.