Shqipëria si Bahamas në 2017-ën???

Në emisionin Opinion të Blendi Fevziut, Berisha deklaroi dje se nuk del në pension pa realizuar projektin madhor të tijin për bërjen e Shqipërisë vend të zhvilluar deri në vitin 2017. “Vetëm i Gjithëfuqishmi atje lart ose Sovrani këtu poshtë në tokë mund të më pengojnë në realizimin e këtij projekti madhor”, tha Berisha, me një shprehje mbinjeriu në fytyrë. Por çfarë nënkupton termi vend i zhvilluar?

Sipas PNUD-it, vende të zhvilluara konsiderohen ato që renditen në 43 vendet e para të listës që i rendit ato në bazë të Indeksit të Zhvillimit Njerëzor. Ky indeks ndërtohet duke ponderuar treguesit e Produktit të Brendshëm Bruto (PBB) për frymë, industrializimit, jetëgjatësisë, arsimimit, nivelin të varfërisë, etj. Aktualisht, vendin e fundit në listën e PNUD-it për vendet e zhvilluara e zë Bahamas që, sipas The World Factbook të CIA-s, kishte rreth 31.000 dollarë PBB për frymë në vitin 2011. Konvertimi i monedhës vendase është bërë në bazë të fuqisë blerëse të saj, jo në bazë të kursit të këmbimit në tregun valuator. Krahasimisht, Shqipëria kishte vetëm 7800 dollarë PBB për frymë. Që ne të arrijmë Bahamas në vitin 2017, duhet që Produkti i Brendshëm Bruto i Bahamas të mos rritet fare në këto 5 vjet ndërkohë që i yni të rritet mesatarisht 26% në vit. Sipas parashikimit optimist të Ministrisë së Financave të Shqipërisë, rritja e PBB-së do të jetë në nivelin 3-4% në tri vitet e ardhshëm. Ndërsa sipas FMN-së, rritja e PBB-së së Bahamas në tri vitet e ardhëshme do të jetë 2-3% Me këto ritme rritjeje ne mund ta arrijmë nivelin e Bahamas në vitin 2071, e jo në 2017. Por atëherë, fatkeqësisht, i Gjithëfuqishmi atje lart do të ketë mbaruar punë me Berishën…

E.Zaloshnja