Busek: Ndarja e Kosovës është opcion i mirë; Demaçi: Busek është jaran i Beogradit

Ehard Busek është një konservator austriak, që njihet në diplomacinë e kontinentit  për një sërë rolesh që ka luajtur (deri para pak kohësh ish dhe koordinator i Paktit të Stabilitetit për Europën Jug-lindore). Tash së fundmi, ai është shprehur se “ndarja e Kosovës është opcioni më i mirë”.

Sot ka reaguar veterani i politikës kosovare, Adem Demaçi. I intervistuar nga radio ‘Presheva Jonë’, ai e ka lënë elegancën mënjanë, dhe e ka injoruar duke thënë se Busek është askushi . “Nëse paska folur diçka, [ai e ka bërë këtë] sa për të treguar se është gjallë”. Më poshtë, ai është shprehur, se disa politikanë që lënë postet, nuk arrijnë të mësohen me faktin që nuk kanë më ndikim e pushtet, dhe prandaj  “edhe ia futin kot vetëm sa për të ngritur pluhur”.

Në fund Demaçi ka bërë nënkuptime të qarta, të cilat nuk do ta bëjnë të lumtur Busek-un, kur t’i shkojnë në vesh: “Këto deklarata të tij të përkujtojnë deklaratat e stilit të Del Pontes, Solanës, Dick Marty-t, etj, të cilët kanë jaraní (dashuri e fshehtë. Re.Pu.) të fortë me Serbinë.... Bota është mbushur plot ryshfete e korrupsione dhe kush e din se për kë ata punojnë tashmë”.

Re.Pu.