Misteri i tensionimit të papritur të situatës në Lazarat. Grup i frymëzuar nga ISIS apo i përdorur në funksion të politikës dhe zgjedhjeve? (Video)

Ngjarja më e fundit në Lazrat ku mbeti i vrarë një efektiv i forcave Renea ka ngritur disa pikëpyetje lidhur me tensionimin e papritur të situatës në fshatin Lazarat. Vetë ministri i Brendshëm, Sajmir Tahiri në një prononcim nga Gjirokastra e quajti një akt terrorist, por pa specifikuar nëse aktiviteti i grupit të armatosur që qëlloi mbi policinë lidhet me ekstremizmin fetar dhe infiltrimin e elementëve terroristë.

Dëshmia e Xhuliano Matos, 17 vjeçarit të kapur me një arsenal municionalsh dhe një automjet të bardhë që dyshohet se u përdor për të futur në kuth policinë raportohet të ketë thënë se grupi I zjarrit është i pajisur me armë të sofistikuara dhe snajpera, ndërsa në profilin e tij në facebook ka mesazhe dhe fotografi me përmbajtje fetare.

Ekstremizmi fetar i frymëzuar nga ISIS është një nga pistat jo për t’u injoruar, por që në këtë rast mund të hidhet për të devijuar hetimin nga qëllimi i vërtetë i sulmit mbi policinë dhe organizatorët. Policia nuk e ka mbështetur pistën e elementëve terroristë dhe shpalli një listë të përhershme me disa persona, një pjesë e të cilëve ishin në kërkim që prej një viti, ndërsa njëri nga të dyshuarit e policisë rezultonte në burg.

Nga sa duket edhe vetë policia u gjet e papërgatitur dhe nëse do të kishte informacion për grupe terroriste jo vetëm do ishte deklaruar për këtë kërcënim që lidhet me sigurinë kombëtare, por edhe do kishte operuar ndryshe në terren. Në emisionin “Opinion” në Tv Klan u diskutuan të dyja pistat.

Gazetari i ABC News, Ferdinand Dervishi mbështeti idenë se ngjarja e Lazratit ka lidhje me zgjedhjet dhe se grupi i të rinjve është përdorur nga elementë që kanë lidhje me politikën. Një pyetje që mund të shtrohet dhe që lidhet me Lazratin është se kujt grupimi politik i intereson zhvendosja e vëmendjes nga rezultati i zgjedhjeve të 21 Qershorit?

Ndaj grupit të forcave Renea në Lazarat u qëllua me batare plumbash dhe jo me një snajper siç u tha fillimisht. Në vendngjarje janë gjetur rreth 100 gëzhoja plumbash që do të analizohen nga ekspertët e porokurorisë për të mësuar se ku fle misteri i tensionimit të papritur të situatës në Lazarat.

l.m

IMG_2167 by trelosjermatis